Skandha 10, Adhyāya 35

गोप्यः कृष्णे वनं याते तमनुद्रुतचेतसः ।कृष्णलीलाः प्रगायन्त्यो निन्युर्दुःखेन वासरान्॥ 1 ॥

gopyaḥ kṛṣṇe vanaṃ yāte tamanudrutacetasaḥ | kṛṣṇalīlāḥ pragāyantyo ninyurduḥkhena vāsarān

वामबाहुकृतवामकपोलो वल्गितभ्रुरधरार्पितवेणुम् ।कोमलाङ्गुलिभिराश्रितमार्गं गोप्य ईरयति यत्र मुकुन्दः॥ 2 ॥

vāmabāhukṛtavāmakapolo valgitabhruradharārpitaveṇum | komalāṅgulibhirāśritamārgaṃ gopya īrayati yatra mukundaḥ

व्योमयानवनिताः सहसिद्धै- र्विस्मितास्तदुपधार्य सलज्जाः ।काममार्गणसमर्पितचित्ताः कश्मलं ययुरपस्मृतनीव्यः॥ 3 ॥

vyomayānavanitāḥ sahasiddhai- rvismitāstadupadhārya salajjāḥ | kāmamārgaṇasamarpitacittāḥ kaśmalaṃ yayurapasmṛtanīvyaḥ

हन्त चित्रमबलाः शृणुतेदं हारहास उरसि स्थिरविद्युत् ।नन्दसूनुरयमार्तजनानां नर्मदो यर्हि कूजितवेणुः॥ 4 ॥

hanta citramabalāḥ śṛṇutedaṃ hārahāsa urasi sthiravidyut | nandasūnurayamārtajanānāṃ narmado yarhi kūjitaveṇuḥ

वृन्दशो व्रजवृषा मृगगावो वेणुवाद्यहृतचेतस आरात् ।दन्तदष्टकवला धृतकर्णा निद्रिता लिखितचित्रमिवासन्॥ 5 ॥

vṛndaśo vrajavṛṣā mṛgagāvo veṇuvādyahṛtacetasa ārāt | dantadaṣṭakavalā dhṛtakarṇā nidritā likhitacitramivāsan

बर्हिणस्तबकधातुपलाशै- र्बद्धमल्लपरिबर्हविडम्बः ।कर्हिचित्सबल आलि सगोपै- र्गाः समाह्वयति यत्र मुकुन्दः॥ 6 ॥

barhiṇastabakadhātupalāśai- rbaddhamallaparibarhaviḍambaḥ | karhicitsabala āli sagopai- rgāḥ samāhvayati yatra mukundaḥ

तर्हि भग्नगतयः सरितो वै तत्पदाम्बुजरजोऽनिलनीतम् ।स्पृहयतीर्वयमिवाबहुपुण्याः प्रेमवेपितभुजाः स्तिमितापः॥ 7 ॥

tarhi bhagnagatayaḥ sarito vai tatpadāmbujarajo'nilanītam | spṛhayatīrvayamivābahupuṇyāḥ premavepitabhujāḥ stimitāpaḥ

अनुचरैः समनुवर्णितवीर्य आदिपूरुष इवाचलभूतिः ।वनचरो गिरितटेषु चरन्ती- र्वेणुनाऽऽह्वयति गाः स यदा हि॥ 8 ॥

anucaraiḥ samanuvarṇitavīrya ādipūruṣa ivācalabhūtiḥ | vanacaro giritaṭeṣu carantī- rveṇunā''hvayati gāḥ sa yadā hi

वनलतास्तरव आत्मनि विष्णुं व्यञ्जयन्त्य इव पुष्पफलाढ्याः ।प्रणतभारविटपा मधुधाराः प्रेमहृष्टतनवः ससृजुः स्म॥ 9 ॥

vanalatāstarava ātmani viṣṇuṃ vyañjayantya iva puṣpaphalāḍhyāḥ | praṇatabhāraviṭapā madhudhārāḥ premahṛṣṭatanavaḥ sasṛjuḥ sma

दर्शनीयतिलको वनमाला- दिव्यगन्धतुलसीमधुमत्तैः ।अलिकुलैरलघुगीतमभीष्ट- माद्रियन् यर्हि सन्धितवेणुः॥ 10 ॥

darśanīyatilako vanamālā- divyagandhatulasīmadhumattaiḥ | alikulairalaghugītamabhīṣṭa- mādriyan yarhi sandhitaveṇuḥ

सरसि सारसहंसविहङ्गा- श्चारुगीतहृतचेतस एत्य ।हरिमुपासत ते यतचित्ता हन्त मीलितदृशो धृतमौनाः॥ 11 ॥

sarasi sārasahaṃsavihaṅgā- ścārugītahṛtacetasa etya | harimupāsata te yatacittā hanta mīlitadṛśo dhṛtamaunāḥ

सहबलः स्रगवतंसविलासः सानुषु क्षितिभृतो व्रजदेव्यः ।हर्षयन् यर्हि वेणुरवेण जातहर्ष उपरम्भति विश्वम्॥ 12 ॥

sahabalaḥ sragavataṃsavilāsaḥ sānuṣu kṣitibhṛto vrajadevyaḥ | harṣayan yarhi veṇuraveṇa jātaharṣa uparambhati viśvam

महदतिक्रमणशङ्कितचेता मन्दमन्दमनुगर्जति मेघः ।सुहृदमभ्यवर्षत्सुमनोभि- श्छायया च विदधत्प्रतपत्रम्॥ 13 ॥

mahadatikramaṇaśaṅkitacetā mandamandamanugarjati meghaḥ | suhṛdamabhyavarṣatsumanobhi- śchāyayā ca vidadhatpratapatram

विविधगोपचरणेषु विदग्धो वेणुवाद्य उरुधा निजशिक्षाः ।तव सुतः सति यदाधरबिम्बे दत्तवेणुरनयत्स्वरजातीः॥ 14 ॥

vividhagopacaraṇeṣu vidagdho veṇuvādya urudhā nijaśikṣāḥ | tava sutaḥ sati yadādharabimbe dattaveṇuranayatsvarajātīḥ

सवनशस्तदुपधार्य सुरेशाः शक्रशर्वपरमेष्ठिपुरोगाः ।कवय आनतकन्धरचित्ताः कश्मलं ययुरनिश्चिततत्त्वाः॥ 15 ॥

savanaśastadupadhārya sureśāḥ śakraśarvaparameṣṭhipurogāḥ | kavaya ānatakandharacittāḥ kaśmalaṃ yayuraniścitatattvāḥ

निजपदाब्जदलैर्ध्वजवज्र- नीरजाङ्कुशविचित्रललामैः ।व्रजभुवः शमयन् खुरतोदं वर्ष्मधुर्यगतिरीडितवेणुः॥ 16 ॥

nijapadābjadalairdhvajavajra- nīrajāṅkuśavicitralalāmaiḥ | vrajabhuvaḥ śamayan khuratodaṃ varṣmadhuryagatirīḍitaveṇuḥ

व्रजति तेन वयं सविलास वीक्षणार्पितमनोभववेगाः ।कुजगतिं गमिता न विदामः कश्मलेन कबरं वसनं वा॥ 17 ॥

vrajati tena vayaṃ savilāsa vīkṣaṇārpitamanobhavavegāḥ | kujagatiṃ gamitā na vidāmaḥ kaśmalena kabaraṃ vasanaṃ vā

मणिधरः क्वचिदागणयन् गा मालया दयित गन्धतुलस्याः ।प्रणयिनोऽनुचरस्य कदांसे प्रक्षिपन् भुजमगायत यत्र॥ 18 ॥

maṇidharaḥ kvacidāgaṇayan gā mālayā dayita gandhatulasyāḥ | praṇayino'nucarasya kadāṃse prakṣipan bhujamagāyata yatra

क्वणितवेणुरववञ्चितचित्ताः कृष्णमन्वसत कृष्णगृहिण्यः ।गुणगणार्णमनुगत्य हरिण्यो गोपिका इव विमुक्तगृहाशाः॥ 19 ॥

kvaṇitaveṇuravavañcitacittāḥ kṛṣṇamanvasata kṛṣṇagṛhiṇyaḥ | guṇagaṇārṇamanugatya hariṇyo gopikā iva vimuktagṛhāśāḥ

कुन्ददामकृतकौतुकवेषो गोपगोधनवृतो यमुनायाम् ।नन्दसूनुरनघे तव वत्सो नर्मदः प्रणयिणां विजहार॥ 20 ॥

kundadāmakṛtakautukaveṣo gopagodhanavṛto yamunāyām | nandasūnuranaghe tava vatso narmadaḥ praṇayiṇāṃ vijahāra

मन्दवायुरुपवात्यनकूलं मानयन् मलयजस्पर्शेन ।वन्दिनस्तमुपदेवगणा ये वाद्यगीतबलिभिः परिवव्रुः॥ 21 ॥

mandavāyurupavātyanakūlaṃ mānayan malayajasparśena | vandinastamupadevagaṇā ye vādyagītabalibhiḥ parivavruḥ

वत्सलो व्रजगवां यदगध्रो वन्द्यमानचरणः पथि वृद्धैः ।कृत्स्नगोधनमुपोह्य दिनान्ते गीतवेणुरनुगेडितकीर्तिः॥ 22 ॥

vatsalo vrajagavāṃ yadagadhro vandyamānacaraṇaḥ pathi vṛddhaiḥ | kṛtsnagodhanamupohya dinānte gītaveṇuranugeḍitakīrtiḥ

उत्सवं श्रमरुचापि दृशीना- मुन्नयन् खुररजश्छुरितस्रक् ।दित्सयैति सुहृदाशिष एष देवकीजठरभूरुडुराजः॥ 23 ॥

utsavaṃ śramarucāpi dṛśīnā- munnayan khurarajaśchuritasrak | ditsayaiti suhṛdāśiṣa eṣa devakījaṭharabhūruḍurājaḥ

मदविघूर्णितलोचन ईष- न्मानदः स्वसुहृदां वनमाली ।बदरपाण्डुवदनो मृदुगण्डं मण्डयन् कनककुण्डललक्ष्म्या॥ 24 ॥

madavighūrṇitalocana īṣa- nmānadaḥ svasuhṛdāṃ vanamālī | badarapāṇḍuvadano mṛdugaṇḍaṃ maṇḍayan kanakakuṇḍalalakṣmyā

यदुपतिर्द्विरदराजविहारो यामिनीपतिरिवैष दिनान्ते ।मुदितवक्त्र उपयाति दुरन्तं मोचयन् व्रजगवां दिनतापम्॥ 25 ॥

yadupatirdviradarājavihāro yāminīpatirivaiṣa dinānte | muditavaktra upayāti durantaṃ mocayan vrajagavāṃ dinatāpam

एवं व्रजस्त्रियो राजन् कृष्णलीला नु गायतीः ।रेमिरेऽहःसु तच्चित्तास्तन्मनस्का महोदयाः॥ 26 ॥

evaṃ vrajastriyo rājan kṛṣṇalīlā nu gāyatīḥ | remire'haḥsu taccittāstanmanaskā mahodayāḥ

दशमस्कन्धे पूर्वार्धे वृन्दावनक्रीडायां गोपिकायुगलगीतं नाम पञ्चत्रिंशोऽध्यायः॥ 35 ॥

daśamaskandhe pūrvārdhe vṛndāvanakrīḍāyāṃ gopikāyugalagītaṃ nāma pañcatriṃśo'dhyāyaḥ