पद ४९

देव-- दनुज-बन-दहन, गुन-गहन, गोबिंद नंदादि-आनंद-दाताऽबिनाशी ।शंभु, शिव, रुद्र, शंकर, भयंकर, भीम, घोर, तेजायतन, क्रोध-राशी॥ 1 ॥

deva-- danuja-bana-dahana, guna-gahana, gobiṃda naṃdādi-ānaṃda-dātā'bināśī | śaṃbhu, śiva, rudra, śaṃkara, bhayaṃkara, bhīma, ghora, tejāyatana, krodha-rāśī

अनँत, भगवंत, जगदंत-अंतक-त्रास-शमन, श्रीरमन, भुवनाभिरामं ।भूधराधीश जगदीश ईशान, बिज्ञानघन, ज्ञान-कल्यान-धामं॥ 2 ॥

ana~ta, bhagavaṃta, jagadaṃta-aṃtaka-trāsa-śamana, śrīramana, bhuvanābhirāmaṃ | bhūdharādhīśa jagadīśa īśāna, bijñānaghana, jñāna-kalyāna-dhāmaṃ

वामनाव्यक्त, पावन, परावर, बिभो, प्रकट परमातमा, प्रकृति-स्वामी ।चंद्रशेखर, शूलपाणि, हर, अनघ, अज, अमित, अबिछिन्न, वृषभेश-गामी॥ 3 ॥

vāmanāvyakta, pāvana, parāvara, bibho, prakaṭa paramātamā, prakṛti-svāmī | caṃdraśekhara, śūlapāṇi, hara, anagha, aja, amita, abichinna, vṛṣabheśa-gāmī

नीलजलदाभ तनु श्याम, बहु काम छबि राम राजीवलोचन कृपाला ।कंबु-कर्पूर-बपु धवल, निर्मल, मौलि जटा, सुर-तटिनि, सित सुमन माला॥ 4 ॥

nīlajaladābha tanu śyāma, bahu kāma chabi rāma rājīvalocana kṛpālā | kaṃbu-karpūra-bapu dhavala, nirmala, mauli jaṭā, sura-taṭini, sita sumana mālā

बसन किंजल्कधर, चक्र-सारंग-दर-कंज-कौमोदकी अति बिशाला ।मार-करि-मत्त-मृगराज, त्रैनैन, हर, नौमि अपहरण संसार-जाला॥ 5 ॥

basana kiṃjalkadhara, cakra-sāraṃga-dara-kaṃja-kaumodakī ati biśālā | māra-kari-matta-mṛgarāja, trainaina, hara, naumi apaharaṇa saṃsāra-jālā

कृष्ण, करुणाभवन, दवन कालीय खल, बिपुल कंसादि निर्बंशकारी ।त्रिपुर-मद-भंगकर, मत्तगज-चर्मधर, अन्धकोरग-ग्रसन पन्नगारी॥ 6 ॥

kṛṣṇa, karuṇābhavana, davana kālīya khala, bipula kaṃsādi nirbaṃśakārī | tripura-mada-bhaṃgakara, mattagaja-carmadhara, andhakoraga-grasana pannagārī

ब्रह्म, ब्यापक, अकल, सकल, पर, परमहित, ग्यान, गोतीत गुण-वृत्ति-हर्त्ता ।सिंधुसुत-गर्व-गिरि-वज्र, गौरीश, भव, दक्ष-मख अखिल बिध्वंसकर्त्ता॥ 7 ॥

brahma, byāpaka, akala, sakala, para, paramahita, gyāna, gotīta guṇa-vṛtti-harttā | siṃdhusuta-garva-giri-vajra, gaurīśa, bhava, dakṣa-makha akhila bidhvaṃsakarttā

भक्तिप्रिय, भक्तजन-कामधुक धेनु, हरि हरण दुर्घट बिकट बिपति भारी ।सुखद, नर्मद, वरद, बिरज, अनवद्यऽखिल, बिपिन-आनंद-बीथिन-बिहारी॥ 8 ॥

bhaktipriya, bhaktajana-kāmadhuka dhenu, hari haraṇa durghaṭa bikaṭa bipati bhārī | sukhada, narmada, varada, biraja, anavadya'khila, bipina-ānaṃda-bīthina-bihārī

रुचिर हरिशंकरी नाम-मंत्रावली द्वंद्वदुख हरनि, आनंदखानी ।बिष्णु-शिव-लोक-सोपान-सम सर्बदा बदति तुलसीदास बिशद बानी॥ 9 ॥

rucira hariśaṃkarī nāma-maṃtrāvalī dvaṃdvadukha harani, ānaṃdakhānī | biṣṇu-śiva-loka-sopāna-sama sarbadā badati tulasīdāsa biśada bānī