पद ४४

जयति राज-राजेंद्र राजीवलोचन, राम, नाम कलि-कामतरु, साम-शाली ।अनय-अंभोधि-कुंभज, निशाचर-निकर-तिमिर-घनघोर-खरकिरणमाली॥ 1 ॥

jayati rāja-rājeṃdra rājīvalocana, rāma, nāma kali-kāmataru, sāma-śālī | anaya-aṃbhodhi-kuṃbhaja, niśācara-nikara-timira-ghanaghora-kharakiraṇamālī

जयति मुनि-देव-नरदेव दसरत्थके, देव-मुनि-बंद्य किय अवध-बासी ।लोकनायक-कोक-शोक-संकट-शमन, भानुकुल-कमल-कानन-बिकासी॥ 2 ॥

jayati muni-deva-naradeva dasaratthake, deva-muni-baṃdya kiya avadha-bāsī | lokanāyaka-koka-śoka-saṃkaṭa-śamana, bhānukula-kamala-kānana-bikāsī

जयति शृंगार-सर तामरस-दामदुति-देह, गुणगेह, बिश्वोपकारी ।सकल सौभाग्य-सौंदर्य-सुषमारूप, मनोभव कोटि गर्वापहारी॥ 3 ॥

jayati śṛṃgāra-sara tāmarasa-dāmaduti-deha, guṇageha, biśvopakārī | sakala saubhāgya-sauṃdarya-suṣamārūpa, manobhava koṭi garvāpahārī

जयति सुभग सारंग सुनिषंग सायक शक्ति, चारु चर्मासि बर बर्मधारी ।धर्मधुरधीर, रघुबीर, भुजबल अतुल, हेलया दलित भूभार भारी॥ 4 ॥

jayati subhaga sāraṃga suniṣaṃga sāyaka śakti, cāru carmāsi bara barmadhārī | dharmadhuradhīra, raghubīra, bhujabala atula, helayā dalita bhūbhāra bhārī

जयति कलधौत मणि-मुकुट, कुंडल, तिलक-झलक भलि भाल, बिधु-बदन-शोभा ।दिव्य भूषन, बसन पीत, उपबीत, किय ध्यान कल्यान-भाजन न को भा॥ 5 ॥

jayati kaladhauta maṇi-mukuṭa, kuṃḍala, tilaka-jhalaka bhali bhāla, bidhu-badana-śobhā | divya bhūṣana, basana pīta, upabīta, kiya dhyāna kalyāna-bhājana na ko bhā

जयति भरत-सौमित्रि-शत्रुघ्न-सेवित, सुमुख, सचिव-सेवक-सुखद, सर्बदाता ।अधम, आरत, दीन, पतित, पातक-पीन सकृत नतमात्र कहि 'पाहि' पाता॥ 6 ॥

jayati bharata-saumitri-śatrughna-sevita, sumukha, saciva-sevaka-sukhada, sarbadātā | adhama, ārata, dīna, patita, pātaka-pīna sakṛta natamātra kahi 'pāhi' pātā

जयति जय भुवन दसचारि जस जगमगत, पुन्यमय, धन्य जय रामराजा ।चरित-सुरसरित कबि-मुख्य गिरि निःसरित, पिबत, मज्जत मुदित सँत-समाजा॥ 7 ॥

jayati jaya bhuvana dasacāri jasa jagamagata, punyamaya, dhanya jaya rāmarājā | carita-surasarita kabi-mukhya giri niḥsarita, pibata, majjata mudita sa~ta-samājā

जयति वर्णाश्रमाचारपर नारि-नर, सत्य-शम-दम-दया-दानशीला ।बिगत दुख-दोष, संतोष सुख सर्बदा, सुनत, गावत राम राजलीला॥ 8 ॥

jayati varṇāśramācārapara nāri-nara, satya-śama-dama-dayā-dānaśīlā | bigata dukha-doṣa, saṃtoṣa sukha sarbadā, sunata, gāvata rāma rājalīlā

जयति बैराग्य-बिज्ञान-वारांनिधे, नमत नर्मद, पाप-ताप-हर्त्ता ।दास तुलसी चरण शरण संशय-हरण, देहि अवलंब बैदेहि-भर्त्ता॥ 9 ॥

jayati bairāgya-bijñāna-vārāṃnidhe, namata narmada, pāpa-tāpa-harttā | dāsa tulasī caraṇa śaraṇa saṃśaya-haraṇa, dehi avalaṃba baidehi-bharttā