पद २४

अब चित चेति चित्रकूटहि चलु ।कोपित कलि, लोपित मंगल मगु, बिलसत बढ़त मोह-माया-मलु॥ 1 ॥

aba cita ceti citrakūṭahi calu | kopita kali, lopita maṃgala magu, bilasata baḍha़ta moha-māyā-malu

भूमि बिलोकु राम-पद-अंकित, बन बिलोकु रघुबर-बिहारथलु ।सैल-सृंग भवभंग-हेतु लखु, दलन कपट-पाखंड-दंभ-दलु॥ 2 ॥

bhūmi biloku rāma-pada-aṃkita, bana biloku raghubara-bihārathalu | saila-sṛṃga bhavabhaṃga-hetu lakhu, dalana kapaṭa-pākhaṃḍa-daṃbha-dalu

जहँ जनमे जग-जनक जगतपति, बिधि-हरि-हर परिहरि प्रपंच छलु ।सकृत प्रबेस करत जेहि आस्रम, बिगत-बिषाद भये पारथ नलु॥ 3 ॥

jaha~ janame jaga-janaka jagatapati, bidhi-hari-hara parihari prapaṃca chalu | sakṛta prabesa karata jehi āsrama, bigata-biṣāda bhaye pāratha nalu

न करु बिलंब बिचारु चारुमति, बरष पाछिले सम अगिले पलु ।मंत्र सो जाइ जपहि, जो जपि भे, अजर अमर हर अचइ हलाहलु॥ 4 ॥

na karu bilaṃba bicāru cārumati, baraṣa pāchile sama agile palu | maṃtra so jāi japahi, jo japi bhe, ajara amara hara acai halāhalu

रामनाम-जप जाग करत नित, मज्जत पय पावन पीवत जलु ।करिहैं राम भावतो मनकौ, सुख-साधन, अनयास महाफलु॥ 5 ॥

rāmanāma-japa jāga karata nita, majjata paya pāvana pīvata jalu | karihaiṃ rāma bhāvato manakau, sukha-sādhana, anayāsa mahāphalu

कामदमनि कामता, कलपतरु सो जुग-जुग जागत जगतीतलु ।तुलसी तोहि बिसेषि बूझिये, एक प्रतीति-प्रीति एकै बलु॥ 6 ॥

kāmadamani kāmatā, kalapataru so juga-juga jāgata jagatītalu | tulasī tohi biseṣi būjhiye, eka pratīti-prīti ekai balu