पद १९३

अजहुँ आपने रामके करतब समुझत हित होइ ।कहँ तू, कहँ कोसलधनी, तोको कहा कहत सब कोइ॥ 1 ॥

ajahu~ āpane rāmake karataba samujhata hita hoi | kaha~ tū, kaha~ kosaladhanī, toko kahā kahata saba koi

रीझि निवाज्यो कबहिं तू, कब खीझि दई तोहिं गारि ।दरपन बदन निहारिकै, सुबिचारि मान हिय हारि॥ 2 ॥

rījhi nivājyo kabahiṃ tū, kaba khījhi daī tohiṃ gāri | darapana badana nihārikai, subicāri māna hiya hāri

बिगरी जनम अनेककी सुधरत पल लगै न आधु ।'पाहि कृपानिधि' प्रेमसों कहे को न राम कियो साधु॥ 3 ॥

bigarī janama anekakī sudharata pala lagai na ādhu | 'pāhi kṛpānidhi' premasoṃ kahe ko na rāma kiyo sādhu

बालमीकि-केवट-कथा, कपि-भील-भालु-सनमान ।सुनि सनमुख जो न रामसों, तिहि को उपदेसहि ग्यान॥ 4 ॥

bālamīki-kevaṭa-kathā, kapi-bhīla-bhālu-sanamāna | suni sanamukha jo na rāmasoṃ, tihi ko upadesahi gyāna

का सेवा सुग्रीवकी, का प्रीति-रीति-निरबाहु ।जासु बंधु बध्यो ब्याध ज्यों, सो सुनत सोहात न काहु॥ 5 ॥

kā sevā sugrīvakī, kā prīti-rīti-nirabāhu | jāsu baṃdhu badhyo byādha jyoṃ, so sunata sohāta na kāhu

भजन बिभीषनको कहा, फल कहा दियो रघुराज ।राम गरीब-निवाजके बड़ी बाँह-बोलकी लाज॥ 6 ॥

bhajana bibhīṣanako kahā, phala kahā diyo raghurāja | rāma garība-nivājake baḍa़ī bā~ha-bolakī lāja

जपहि नाम रघुनाथको, चरचा दूसरी न चालु ।सुमुख, सुखद, साहिब, सुधी, समरथ, कृपालु, नतपालु॥ 7 ॥

japahi nāma raghunāthako, caracā dūsarī na cālu | sumukha, sukhada, sāhiba, sudhī, samaratha, kṛpālu, natapālu

सजल नयन, गदगद गिरा, गहबर मन, पुलक सरीर ।गावत गुनगन रामके केहिकी न मिटी भव-भीर॥ 8 ॥

sajala nayana, gadagada girā, gahabara mana, pulaka sarīra | gāvata gunagana rāmake kehikī na miṭī bhava-bhīra

प्रभु कृतग्य सरवग्य हैं, परिहरु पाछिली गलानि ।तुलसी तोसों रामसों कछु नई न जान-पहिचानि॥ 9 ॥

prabhu kṛtagya saravagya haiṃ, pariharu pāchilī galāni | tulasī tosoṃ rāmasoṃ kachu naī na jāna-pahicāni