Parva 3, Adhyāya 86

पिशाचैः, मुनिभिः अप्सरोभिश्च साकं उमासहितस्य भगवतः शङ्करस्य श्रीकृष्णस्य समीपे गमनं तस्याग्रे समपद्यन्त भूतसङ्घाः सहस्रशः ।घण्टाकर्णो विरूपाक्षः कुण्डधार कुमुद्वहः॥ 1 ॥

piśācaiḥ, munibhiḥ apsarobhiśca sākaṃ umāsahitasya bhagavataḥ śaṅkarasya śrīkṛṣṇasya samīpe gamanaṃ tasyāgre samapadyanta bhūtasaṅghāḥ sahasraśaḥ | ghaṇṭākarṇo virūpākṣaḥ kuṇḍadhāra kumudvahaḥ

दीर्घरोमा दीर्घभुजो दीर्घबाहुर्निरञ्जनः ।उरुनेत्रः शतमुखः शतग्रीवः शतोदरः॥ 2 ॥

dīrgharomā dīrghabhujo dīrghabāhurnirañjanaḥ | urunetraḥ śatamukhaḥ śatagrīvaḥ śatodaraḥ

कुण्डोदरो महाग्रीवः स्थूलजिह्वो द्विबाहुकः ।पार्श्ववक्त्रः सिंहमुख उन्नतांसो महाहनुः॥ 3 ॥

kuṇḍodaro mahāgrīvaḥ sthūlajihvo dvibāhukaḥ | pārśvavaktraḥ siṃhamukha unnatāṃso mahāhanuḥ

त्रिबाहुः पञ्चबाहुश्च व्याघ्रवक्त्रः सिताननः ।एते चान्ये च बहवो दीर्घास्या दीर्घलोचनाः॥ 4 ॥

tribāhuḥ pañcabāhuśca vyāghravaktraḥ sitānanaḥ | ete cānye ca bahavo dīrghāsyā dīrghalocanāḥ

नृत्यन्तः प्रहसन्तश्च स्फोटयन्तः परस्परम् ।तथान्ये घोररूपाश्च तथान्ये विकृताननाः॥ 5 ॥

nṛtyantaḥ prahasantaśca sphoṭayantaḥ parasparam | tathānye ghorarūpāśca tathānye vikṛtānanāḥ

प्रेतभक्षाः प्रेतवाहा मांसशोणितभोजनाः ।शवानि सुबहून्याशु भक्षयन्तस्ततस्ततः॥ 6 ॥

pretabhakṣāḥ pretavāhā māṃsaśoṇitabhojanāḥ | śavāni subahūnyāśu bhakṣayantastatastataḥ

पिबन्तो रुधिरं घोरं खण्डयन्तः शवान् बहून् ।कराला वितता दीर्घा धमनिस्नायुसन्तताः॥ 7 ॥

pibanto rudhiraṃ ghoraṃ khaṇḍayantaḥ śavān bahūn | karālā vitatā dīrghā dhamanisnāyusantatāḥ

नानाविधाः सुवीराश्च शूलाग्रप्रोतमानुषाः ।शिरोमालावृताः केचिदान्त्रपाशावपाशिताः॥ 8 ॥

nānāvidhāḥ suvīrāśca śūlāgraprotamānuṣāḥ | śiromālāvṛtāḥ kecidāntrapāśāvapāśitāḥ

डिण्डिमैरट्टहासैश्च नादयन्तो वसुन्धराम् ।कपालिनो भैरवाश्च जटिला मुण्डिनस्तथा॥ 9 ॥

ḍiṇḍimairaṭṭahāsaiśca nādayanto vasundharām | kapālino bhairavāśca jaṭilā muṇḍinastathā

एवं बहुविधा घोराः पिशाचा विकृताननाः ।तथान्ये मुनिवीराश्च ध्यायन्तः परमेश्वरम्॥ 10 ॥

evaṃ bahuvidhā ghorāḥ piśācā vikṛtānanāḥ | tathānye munivīrāśca dhyāyantaḥ parameśvaram

पठन्तो वेदवाक्यानि साङ्गानि विविधानि च ।कुण्डि=कास्थकराः केचित्केचित्कुशविचारिणः॥ 11 ॥

paṭhanto vedavākyāni sāṅgāni vividhāni ca | kuṇḍi=kāsthakarāḥ kecitkecitkuśavicāriṇaḥ

कौपीनवसनाः केचित् केचित् कार्पाससंवृताः ।स्तुवन्तः शङ्करं भक्त्या स्तोत्रैर्माहेश्वरैस्तथा॥ 12 ॥

kaupīnavasanāḥ kecit kecit kārpāsasaṃvṛtāḥ | stuvantaḥ śaṅkaraṃ bhaktyā stotrairmāheśvaraistathā

एकत्र ते मुनिगणा अपरत्र गणास्तथा ।अन्यत्र सिद्धगन्धर्वाः प्रियाभिः सह सङ्गताः॥ 13 ॥

ekatra te munigaṇā aparatra gaṇāstathā | anyatra siddhagandharvāḥ priyābhiḥ saha saṅgatāḥ

नृत्यन्ति नृत्यकुशला गायन्ति स्म च कन्यकाः ।विद्याधरास्तथान्यत्र स्तुवन्तः शङ्करं शिवम्॥ 14 ॥

nṛtyanti nṛtyakuśalā gāyanti sma ca kanyakāḥ | vidyādharāstathānyatra stuvantaḥ śaṅkaraṃ śivam

ननृतुस्तस्य पुरतो गच्छन्तोऽप्सरसां गणाः ।एवमेतैर्महाघोरैः पिशाचैर्भूतकिन्नरैः॥ 15 ॥

nanṛtustasya purato gacchanto'psarasāṃ gaṇāḥ | evametairmahāghoraiḥ piśācairbhūtakinnaraiḥ

मुनिभिश्चैव प्रमथैः समं शर्वः समाययौ ।यत्र विश्वेश्वरो विष्णुस्तपस्तेपे सुदारुणम्॥ 16 ॥

munibhiścaiva pramathaiḥ samaṃ śarvaḥ samāyayau | yatra viśveśvaro viṣṇustapastepe sudāruṇam

यत्र ते लोकपालाश्च तिष्ठन्ति स्म दिदृक्षया ।उमया लोकभाविन्या गङ्गया चन्द्रशेखरः॥ 17 ॥

yatra te lokapālāśca tiṣṭhanti sma didṛkṣayā | umayā lokabhāvinyā gaṅgayā candraśekharaḥ

स सर्वलोकप्रभवो भवो विभुर्जटी च साक्षात् प्रणवात्मकः कृती ।द्रष्टुं हरिं विष्णुमुदारविक्रमो ययौ यथेष्टं पिशिताशनैर्वृतः॥ 18 ॥

sa sarvalokaprabhavo bhavo vibhurjaṭī ca sākṣāt praṇavātmakaḥ kṛtī | draṣṭuṃ hariṃ viṣṇumudāravikramo yayau yatheṣṭaṃ piśitāśanairvṛtaḥ