Parva 3, Adhyāya 60

कुबेरस्य अनुह्रादेन सार्द्धं भयङ्करं युद्धं धनाध्यक्षमनुह्रादः प्रह्रादस्यानुजो बली ।ससैन्यं योधयामास क्षोभयन् यक्षवाहिनीम्॥ 1 ॥

kuberasya anuhrādena sārddhaṃ bhayaṅkaraṃ yuddhaṃ dhanādhyakṣamanuhrādaḥ prahrādasyānujo balī | sasainyaṃ yodhayāmāsa kṣobhayan yakṣavāhinīm

महता च बलौघेन त्वनुह्रादोऽसुरोत्तमः ।अर्दयामास सङ्क्रुद्धो धनाध्यक्षं प्रतापवान्॥ 2 ॥

mahatā ca balaughena tvanuhrādo'surottamaḥ | ardayāmāsa saṅkruddho dhanādhyakṣaṃ pratāpavān

अमृष्यमाणस्त्रिदशानाहवस्थानुदायुधान् ।चकार कदनं घोरं धनुष्पाणिर्महासुरः॥ 3 ॥

amṛṣyamāṇastridaśānāhavasthānudāyudhān | cakāra kadanaṃ ghoraṃ dhanuṣpāṇirmahāsuraḥ

आवर्त इव सञ्जज्ञे बलस्य महतो महान् ।क्षुभितस्याप्रमेयस्य सागरस्येव सम्प्लवे॥ 4 ॥

āvarta iva sañjajñe balasya mahato mahān | kṣubhitasyāprameyasya sāgarasyeva samplave

त्रिदशानां शरीरैस्तु दानवानां च मेदिनी ।बभूव निचिता घोरैः पर्वतैरिव सम्प्लवे॥ 5 ॥

tridaśānāṃ śarīraistu dānavānāṃ ca medinī | babhūva nicitā ghoraiḥ parvatairiva samplave

मेरुपृष्ठं तु रक्तेन रञ्जितं सम्प्रकाशते ।सर्वतो माधवे मासि पुष्पितैरिव किंशुकः॥ 6 ॥

merupṛṣṭhaṃ tu raktena rañjitaṃ samprakāśate | sarvato mādhave māsi puṣpitairiva kiṃśukaḥ

हतैर्वीरैर्गजैरश्वैः प्रावर्तत महानदी ।शोणितौघा महाघोरा यमराष्ट्रविवर्धिनी॥ 7 ॥

hatairvīrairgajairaśvaiḥ prāvartata mahānadī | śoṇitaughā mahāghorā yamarāṣṭravivardhinī

शकृन्मेदोमहापङ्का सम्प्रकीर्णान्त्रशैवला ।छिन्नकायशिरोमीना अङ्गावयवशाद्वला॥ 8 ॥

śakṛnmedomahāpaṅkā samprakīrṇāntraśaivalā | chinnakāyaśiromīnā aṅgāvayavaśādvalā

गृध्रहंससमाकीर्णा केकिसारसनादिता ।वसाफेनसमाकीर्णा प्रोत्क्रुष्टस्तनितस्वरा॥ 9 ॥

gṛdhrahaṃsasamākīrṇā kekisārasanāditā | vasāphenasamākīrṇā protkruṣṭastanitasvarā

तां कापुरुषदुस्तारां युद्धभूमौ महानदीम् ।नदीमिवातपापाये हंससङ्घोपशोभिताम्॥ 10 ॥

tāṃ kāpuruṣadustārāṃ yuddhabhūmau mahānadīm | nadīmivātapāpāye haṃsasaṅghopaśobhitām

त्रिदशा दानवाश्चैव तेरुस्ते दुस्तरां नदीम् ।यथा पद्मरजोध्वस्तां नलिनीं गजयूथपाः॥ 11 ॥

tridaśā dānavāścaiva teruste dustarāṃ nadīm | yathā padmarajodhvastāṃ nalinīṃ gajayūthapāḥ

ततः सृजन्तं बाणौघाँननुह्रादं रथे स्थितम् ।ददर्श तरसा देवो निघ्नन्तं यक्षवाहिनीम्॥ 12 ॥

tataḥ sṛjantaṃ bāṇaughā~nanuhrādaṃ rathe sthitam | dadarśa tarasā devo nighnantaṃ yakṣavāhinīm

क्रुद्धस्ततो दैत्यबलं सूदयामास वित्तपः ।विक्षिपन्निव खे वायुर्महाभ्रपटलं बलात्॥ 13 ॥

kruddhastato daityabalaṃ sūdayāmāsa vittapaḥ | vikṣipanniva khe vāyurmahābhrapaṭalaṃ balāt

समीक्ष्य तुमुलं युद्धमनुह्रादश्च वीर्यवान् ।रथेनादित्यवर्णेन कुबेरमभिदुद्रुवे॥ 14 ॥

samīkṣya tumulaṃ yuddhamanuhrādaśca vīryavān | rathenādityavarṇena kuberamabhidudruve

स धनुर्धन्विनां श्रेष्ठो विकृष्य रणमूर्धनि ।उत्ससर्ज शितान् बाणान्वित्तेशस्य महात्मनः॥ 15 ॥

sa dhanurdhanvināṃ śreṣṭho vikṛṣya raṇamūrdhani | utsasarja śitān bāṇānvitteśasya mahātmanaḥ

कुबेरं प्राप्य ते बाणा निर्भिद्य सुसमाहिताः ।अपरान्पृष्ठतो जघ्नुर्व्यासक्तान्यक्षराक्षसान्॥ 16 ॥

kuberaṃ prāpya te bāṇā nirbhidya susamāhitāḥ | aparānpṛṣṭhato jaghnurvyāsaktānyakṣarākṣasān

देवः शरैरभिहतो निशितैर्ज्वलनोपमैः ।अनुह्रादं प्रत्युदियात् सङ्क्रुद्धः परमाहवे॥ 17 ॥

devaḥ śarairabhihato niśitairjvalanopamaiḥ | anuhrādaṃ pratyudiyāt saṅkruddhaḥ paramāhave

ततो वैश्रवणो राजा क्रुद्धो यक्षगणैः सह ।ववर्ष शरवर्षाणि दानवं प्रति वीर्यवान्॥ 18 ॥

tato vaiśravaṇo rājā kruddho yakṣagaṇaiḥ saha | vavarṣa śaravarṣāṇi dānavaṃ prati vīryavān

तद्यथा शारदं वर्षं गोवृषः शीघ्रमागतम् ।अपारयन् वारयितुं प्रतिगृह्णन् निमीलितः॥ 19 ॥

tadyathā śāradaṃ varṣaṃ govṛṣaḥ śīghramāgatam | apārayan vārayituṃ pratigṛhṇan nimīlitaḥ

एवमेव कुबेरस्य शरवर्षं महासुरः ।निमीलिताक्षः सहसा दैत्यः सहति दारुणम्॥ 20 ॥

evameva kuberasya śaravarṣaṃ mahāsuraḥ | nimīlitākṣaḥ sahasā daityaḥ sahati dāruṇam

रोषितः शरवर्षेण धनदेन महासुरः ।इन्द्रकेतुप्रतीकाशमभीतोऽपश्यत द्रुमम्॥ 21 ॥

roṣitaḥ śaravarṣeṇa dhanadena mahāsuraḥ | indraketupratīkāśamabhīto'paśyata drumam

प्रवृद्धशाखाविटपं तरुणाङ्कुरपल्लवम् ।उत्पाट्य कुपितो दैत्यस्तरुं फलसमन्वितं २२॥ निजघान हयाञ्छ्रेष्ठान् कुबेरस्य महात्मनः ।तस्य कर्म महाघोरं दृष्ट्वा सर्वे महासुराः॥ 23 ॥

pravṛddhaśākhāviṭapaṃ taruṇāṅkurapallavam | utpāṭya kupito daityastaruṃ phalasamanvitaṃ 22|| nijaghāna hayāñchreṣṭhān kuberasya mahātmanaḥ | tasya karma mahāghoraṃ dṛṣṭvā sarve mahāsurāḥ

सिंहनादं नदन्ति स्म अनुह्रादप्रहर्षिताः ।तयोस्तु तुमुलं युद्धं सञ्जज्ञे देवदैत्ययोः॥ 24 ॥

siṃhanādaṃ nadanti sma anuhrādapraharṣitāḥ | tayostu tumulaṃ yuddhaṃ sañjajñe devadaityayoḥ

ततस्तौ क्रोधरक्ताक्षावन्योन्यवधकाङ्क्षिणौ ।अन्योन्यं विविधैः शस्त्रैर्घोरैर्जघ्नतुराहवे॥ 25 ॥

tatastau krodharaktākṣāvanyonyavadhakāṅkṣiṇau | anyonyaṃ vividhaiḥ śastrairghorairjaghnaturāhave

त्रिदशा दानवान् सर्वे मथित्वा प्राणदंस्तदा ।दानवैस्त्रिदशाश्चापि क्रुद्धैर्भुवि निपातिताः॥ 26 ॥

tridaśā dānavān sarve mathitvā prāṇadaṃstadā | dānavaistridaśāścāpi kruddhairbhuvi nipātitāḥ

दानवास्त्वथ सङ्क्रुद्धास्त्रिदशान् निशितैः शरैः ।विव्यधुर्वज्रसङ्काशैः कङ्कपत्रैरजिह्मगैः॥ 27 ॥

dānavāstvatha saṅkruddhāstridaśān niśitaiḥ śaraiḥ | vivyadhurvajrasaṅkāśaiḥ kaṅkapatrairajihmagaiḥ

विदार्यमाणा दैत्यौघैस्त्रिदशास्तु महाबलाः ।अमर्षिततराश्चक्रुर्युद्धकर्माण्यभीतवत्॥ 28 ॥

vidāryamāṇā daityaughaistridaśāstu mahābalāḥ | amarṣitatarāścakruryuddhakarmāṇyabhītavat

तैर्गदाभिः सुभीमाभिः पट्टिशैः शूलमुद्गरैः ।परिघैश्च सुतीक्ष्णाग्रैर्दानवाः पीडिताः शरैः॥ 29 ॥

tairgadābhiḥ subhīmābhiḥ paṭṭiśaiḥ śūlamudgaraiḥ | parighaiśca sutīkṣṇāgrairdānavāḥ pīḍitāḥ śaraiḥ

शरनिर्भिन्नगात्राश्च खड्गविच्छिन्नवक्षसः ।जगृहुस्ते शिलाश्चैव द्रुमाश्चासुरसत्तमाः॥ 30 ॥

śaranirbhinnagātrāśca khaḍgavicchinnavakṣasaḥ | jagṛhuste śilāścaiva drumāścāsurasattamāḥ

ते भीमवेगा दितिजा नर्दमानाः पुनः पुनः ।ममन्थुस्त्रिदशान् वीर्याच्छतशोऽथ सहस्रशः॥ 31 ॥

te bhīmavegā ditijā nardamānāḥ punaḥ punaḥ | mamanthustridaśān vīryācchataśo'tha sahasraśaḥ

ततस्तु तुमुलं युद्धं तेषां समभिवर्तत ।शिलाभिर्विपुलाभिश्च शतशश्चैव पादपैः॥ 32 ॥

tatastu tumulaṃ yuddhaṃ teṣāṃ samabhivartata | śilābhirvipulābhiśca śataśaścaiva pādapaiḥ

परिघैः पट्टिशैर्भल्लैर्भिन्दिपालैः परश्वधैः ।केचिन्निवृत्तशिरसः केचिच्च विदलीकृताः॥ 33 ॥

parighaiḥ paṭṭiśairbhallairbhindipālaiḥ paraśvadhaiḥ | kecinnivṛttaśirasaḥ kecicca vidalīkṛtāḥ

केचिद् विनिहता भूमौ रुधिरार्द्राः सुरासुराः ।केचिद् रणाजिरान्नष्टाः परस्परवधार्दिताः॥ 34 ॥

kecid vinihatā bhūmau rudhirārdrāḥ surāsurāḥ | kecid raṇājirānnaṣṭāḥ parasparavadhārditāḥ

विभिन्नहृदयाः केचिच्छिन्नपादाश्च शेरते ।विदारितास्त्रिशूलैश्च केचित् तत्र गतासवः॥ 35 ॥

vibhinnahṛdayāḥ kecicchinnapādāśca śerate | vidāritāstriśūlaiśca kecit tatra gatāsavaḥ

तत् सुभीमं महद्युद्धं देवदानवसङ्कुलम् ।बभूव तुमुलं युद्धं शिलापादपसङ्कुलम्॥ 36 ॥

tat subhīmaṃ mahadyuddhaṃ devadānavasaṅkulam | babhūva tumulaṃ yuddhaṃ śilāpādapasaṅkulam

धनुर्ज्यातन्त्रिमधुरं हिक्कातालसमन्वितम् ।आर्तस्तनितघोषाढ्यं युद्धं गान्धर्वमाबभौ॥ 37 ॥

dhanurjyātantrimadhuraṃ hikkātālasamanvitam | ārtastanitaghoṣāḍhyaṃ yuddhaṃ gāndharvamābabhau

कुबेरः स धनुष्पाणिर्दानवान् रणमूर्धनि ।दिशो विद्रावयामास सङ्क्रुद्धः शरवृष्टिभिः॥ 38 ॥

kuberaḥ sa dhanuṣpāṇirdānavān raṇamūrdhani | diśo vidrāvayāmāsa saṅkruddhaḥ śaravṛṣṭibhiḥ

कुबेरेणार्दितं सैन्यं विद्रुतं प्रेक्ष्य दानवः ।अम्यद्रवदनुह्रादः प्रगृह्य महतीं शिलाम्॥ 39 ॥

kubereṇārditaṃ sainyaṃ vidrutaṃ prekṣya dānavaḥ | amyadravadanuhrādaḥ pragṛhya mahatīṃ śilām

क्रोधाद् द्विगुणरक्ताक्षः पितृतुल्यपराक्रमः ।शिलां तां पातयामास कुबेरस्य रथोत्तमे॥ 40 ॥

krodhād dviguṇaraktākṣaḥ pitṛtulyaparākramaḥ | śilāṃ tāṃ pātayāmāsa kuberasya rathottame

आपतन्तीं शिलां दृष्ट्वा गदापाणिर्धनाधिपः ।रथादाप्लुत्य वेगेन वसुधायां व्यतिष्ठत॥ 41 ॥

āpatantīṃ śilāṃ dṛṣṭvā gadāpāṇirdhanādhipaḥ | rathādāplutya vegena vasudhāyāṃ vyatiṣṭhata

सचक्रकूबरहयं सध्वजं सशरासनम् ।भङ्क्त्वा रथोत्तमं तस्य निपपात शिला भुवि॥ 42 ॥

sacakrakūbarahayaṃ sadhvajaṃ saśarāsanam | bhaṅktvā rathottamaṃ tasya nipapāta śilā bhuvi

विमथ्य तु कुबेरस्य प्रह्रादस्यानुजो रथम् ।शूराणां कदनं चक्रे सस्कन्धविटपैर्द्रुमैः॥ 43 ॥

vimathya tu kuberasya prahrādasyānujo ratham | śūrāṇāṃ kadanaṃ cakre saskandhaviṭapairdrumaiḥ

निर्भिन्नशिरसो भग्नास्त्रिदशाः शोणितोक्षिताः ।द्रुमप्रव्यथिताङ्गाश्च निपेतुर्धरणीतले॥ 44 ॥

nirbhinnaśiraso bhagnāstridaśāḥ śoṇitokṣitāḥ | drumapravyathitāṅgāśca nipeturdharaṇītale

विद्राव्य विपुलं सैन्यमनुह्रादो महासुरः ।गिरिशृङ्गं गृहीत्वा तु कुबेरमभिदुद्रुवे॥ 45 ॥

vidrāvya vipulaṃ sainyamanuhrādo mahāsuraḥ | giriśṛṅgaṃ gṛhītvā tu kuberamabhidudruve

तमापतन्तं धनदो गदामुद्यम्य वीर्यवान् ।विनदित्वाऽऽह्वयामास दानवेन्द्रं महाबलम्॥ 46 ॥

tamāpatantaṃ dhanado gadāmudyamya vīryavān | vinaditvā''hvayāmāsa dānavendraṃ mahābalam

तस्य दैत्यस्य सङ्क्रुद्धो गदां तां बहुकण्टकाम् ।न्यपातयत वित्तेशो दानवस्योरसि प्रभो॥ 47 ॥

tasya daityasya saṅkruddho gadāṃ tāṃ bahukaṇṭakām | nyapātayata vitteśo dānavasyorasi prabho

दैत्यः सक्रोधताम्राक्षस्तं प्रहारमचिन्तयन् ।वित्तेशस्योपरि तदा गिरिशृङ्गमपातयत्॥ 48 ॥

daityaḥ sakrodhatāmrākṣastaṃ prahāramacintayan | vitteśasyopari tadā giriśṛṅgamapātayat

स विह्वलितसर्वाङ्गो गिरिशृङ्गेण ताडितः ।पपात सहसा भूमौ विशीर्ण इव पर्वतः॥ 49 ॥

sa vihvalitasarvāṅgo giriśṛṅgeṇa tāḍitaḥ | papāta sahasā bhūmau viśīrṇa iva parvataḥ

वित्तेशं विह्वलं दृष्ट्वा सर्वे ते यक्षराक्षसाः ।परिवार्य महात्मानं ररक्षुर्भीमविक्रमाः॥ 50 ॥

vitteśaṃ vihvalaṃ dṛṣṭvā sarve te yakṣarākṣasāḥ | parivārya mahātmānaṃ rarakṣurbhīmavikramāḥ

मुहूर्तं विह्वलो भूत्वा पुनर्विश्रवसः सुतः ।उपतस्थे च सहसा धनदः क्रोधमूर्च्छितः॥ 51 ॥

muhūrtaṃ vihvalo bhūtvā punarviśravasaḥ sutaḥ | upatasthe ca sahasā dhanadaḥ krodhamūrcchitaḥ

स ननाद महानादं त्रैलोक्यमभिनादयन् ।जनयन्निव निर्घोषं विधमन्निव पर्वतान्॥ 52 ॥

sa nanāda mahānādaṃ trailokyamabhinādayan | janayanniva nirghoṣaṃ vidhamanniva parvatān

तमवध्यं तु विज्ञाय निहन्तुं पुनरुत्थितम् ।प्रेक्ष्य पिङ्गाक्षमायान्तं दानवा विप्रदुद्रुवुः॥ 53 ॥

tamavadhyaṃ tu vijñāya nihantuṃ punarutthitam | prekṣya piṅgākṣamāyāntaṃ dānavā vipradudruvuḥ

तांस्तु विद्रवतो दृष्ट्वानुह्रादो ह्यसुरोऽब्रवीत् ।कालनेमिं दानवं च वीर्यदर्पसमन्वितम्॥ 54 ॥

tāṃstu vidravato dṛṣṭvānuhrādo hyasuro'bravīt | kālanemiṃ dānavaṃ ca vīryadarpasamanvitam

आत्मानं चैव वीर्यं च विस्मृत्याभिजनं तथा ।क्व गच्छथ भयत्रस्ताः प्राकृता इव दानवाः॥ 55 ॥

ātmānaṃ caiva vīryaṃ ca vismṛtyābhijanaṃ tathā | kva gacchatha bhayatrastāḥ prākṛtā iva dānavāḥ

निवर्तध्वं महावीर्याः किं प्राणान् परिरक्षथ ।नालं युद्धाय यक्षोऽयं महतीयं विभीषिका॥ 56 ॥

nivartadhvaṃ mahāvīryāḥ kiṃ prāṇān parirakṣatha | nālaṃ yuddhāya yakṣo'yaṃ mahatīyaṃ vibhīṣikā

एतां विभीषिकामद्य दानवानां समुत्थिताम् ।विक्रम्य विधमिष्यामि निवर्तध्वं महासुराः॥ 57 ॥

etāṃ vibhīṣikāmadya dānavānāṃ samutthitām | vikramya vidhamiṣyāmi nivartadhvaṃ mahāsurāḥ

तेऽसुराः सन्निवृत्ताश्च समदा इव कुञ्जराः ।निजघ्नुः परमक्रुद्धा देवसैन्यं महासुराः॥ 58 ॥

te'surāḥ sannivṛttāśca samadā iva kuñjarāḥ | nijaghnuḥ paramakruddhā devasainyaṃ mahāsurāḥ

क्षीणप्रहरणाः केचिन्महामेघनिभस्वनाः ।दर्पोत्कटा भुजैरेव सम्प्रहारं प्रचक्रिरे॥ 59 ॥

kṣīṇapraharaṇāḥ kecinmahāmeghanibhasvanāḥ | darpotkaṭā bhujaireva samprahāraṃ pracakrire

प्रांशुभिश्चैव काष्ठैश्च शिलाभिश्च महाबलाः ।बाहुभिश्च तथान्योन्यमाक्षिपन्ति स्म वेगिताः॥ 60 ॥

prāṃśubhiścaiva kāṣṭhaiśca śilābhiśca mahābalāḥ | bāhubhiśca tathānyonyamākṣipanti sma vegitāḥ

मुष्टिभिश्च तलैश्चैव नखपातैर्महाबलाः ।पादपैश्च महाशाखैरयुध्यन्त रणाजिरे॥ 61 ॥

muṣṭibhiśca talaiścaiva nakhapātairmahābalāḥ | pādapaiśca mahāśākhairayudhyanta raṇājire

अनुह्रादस्तु सङ्क्रुद्धो देवतानां महाचमूम् ।ममन्थ परमायत्तो वनान्यग्निरिवोत्थितः॥ 62 ॥

anuhrādastu saṅkruddho devatānāṃ mahācamūm | mamantha paramāyatto vanānyagnirivotthitaḥ

रुधिरार्द्रास्तु बहवः शेरते योधसत्तमाः ।विकृताः पतिता भूमौ ताम्रपुष्पा इव द्रुमाः॥ 63 ॥

rudhirārdrāstu bahavaḥ śerate yodhasattamāḥ | vikṛtāḥ patitā bhūmau tāmrapuṣpā iva drumāḥ

अनुह्रादस्य विक्रान्तो देवस्त्वाशीविषोपमान् ।युध्यमानस्य समरे व्यसृजन्निशिताञ्छरान्॥ 64 ॥

anuhrādasya vikrānto devastvāśīviṣopamān | yudhyamānasya samare vyasṛjanniśitāñcharān

धनाधिपेन विद्धस्य अनुह्रादस्य संयुगे ।अङ्गारमिश्राः क्रुद्धस्य मुखान्निश्चेरुरर्चिषः॥ 65 ॥

dhanādhipena viddhasya anuhrādasya saṃyuge | aṅgāramiśrāḥ kruddhasya mukhānniścerurarciṣaḥ

अथ बाणसहस्रेण वित्तेशं दानवोत्तमः ।विव्याध स शरैः क्रुद्धो दण्डपाणिरिवान्तकः॥ 66 ॥

atha bāṇasahasreṇa vitteśaṃ dānavottamaḥ | vivyādha sa śaraiḥ kruddho daṇḍapāṇirivāntakaḥ

कुबेरस्तु शरैर्भिन्नः समन्तात्क्षतजोक्षितः ।रुधिरं परिसुस्राव गिरिः प्रस्रवणैरिव॥ 67 ॥

kuberastu śarairbhinnaḥ samantātkṣatajokṣitaḥ | rudhiraṃ parisusrāva giriḥ prasravaṇairiva

लब्ध्वा स तु पुनः संज्ञां रोषरक्तेक्षणः सुरः ।गदामथ समासाद्य भीमां भीमपराक्रमः ।चिक्षेप दैत्यमुद्दिश्य बलात्क्रोधेन मूर्छितः॥ 68 ॥

labdhvā sa tu punaḥ saṃjñāṃ roṣaraktekṣaṇaḥ suraḥ | gadāmatha samāsādya bhīmāṃ bhīmaparākramaḥ | cikṣepa daityamuddiśya balātkrodhena mūrchitaḥ

अप्राप्तामन्तरे सोऽथ तां गदां गदयासुरः ।बभञ्ज विनदन् क्रुद्धस्तदाश्चर्यमभूत् तदा॥ 69 ॥

aprāptāmantare so'tha tāṃ gadāṃ gadayāsuraḥ | babhañja vinadan kruddhastadāścaryamabhūt tadā

प्रगृह्य तु गदां भूयो ह्यभिदुद्राव दानवम् ।तमापतन्तं दृष्ट्वैव अनुह्रादो महाबलः॥ 70 ॥

pragṛhya tu gadāṃ bhūyo hyabhidudrāva dānavam | tamāpatantaṃ dṛṣṭvaiva anuhrādo mahābalaḥ

गिरिशृङ्गमिवोत्पाट्य कैलासाचलसन्निभम् ।धनाधिपं प्रदुद्राव व्यादितास्य इवान्तकः॥ 71 ॥

giriśṛṅgamivotpāṭya kailāsācalasannibham | dhanādhipaṃ pradudrāva vyāditāsya ivāntakaḥ

तमन्तकमिवायान्तमजेयं सकलैः सुरैः ।ग्रसन्तमिव तं दैत्यं त्रैलोक्यमखिलं रुषा॥ 72 ॥

tamantakamivāyāntamajeyaṃ sakalaiḥ suraiḥ | grasantamiva taṃ daityaṃ trailokyamakhilaṃ ruṣā

तमालोक्य तथा भूतं धनाध्यक्षो रणं भयात् ।अपहाय ययौ तत्र यत्र शक्रः सुराधिपः॥ 73 ॥

tamālokya tathā bhūtaṃ dhanādhyakṣo raṇaṃ bhayāt | apahāya yayau tatra yatra śakraḥ surādhipaḥ

तस्य चापि महत् कर्म दृष्ट्वा वित्तपतिस्तदा ।जगाम भयसन्त्रस्तो यत्र देवः शचीपतिः॥ 74 ॥

tasya cāpi mahat karma dṛṣṭvā vittapatistadā | jagāma bhayasantrasto yatra devaḥ śacīpatiḥ