Parva 3, Adhyāya 52

श्रुतस्ते दैत्यसैन्यस्य विस्तरो जनमेजय ।भूयस्त्रिदशसैन्यस्य शृणु विस्तरमादितः॥ 1 ॥

śrutaste daityasainyasya vistaro janamejaya | bhūyastridaśasainyasya śṛṇu vistaramāditaḥ

सुराधिपस्तु भगवानाज्ञापयत वै सुरान् ।मरुद्गणास्तथादित्यान् विश्वान्देवांश्च वासवः॥ 2 ॥

surādhipastu bhagavānājñāpayata vai surān | marudgaṇāstathādityān viśvāndevāṃśca vāsavaḥ

वसूनष्टौ भृशं सर्वान् यक्षरक्षोमहोरगान् ।विद्याधरगणान्सर्वान्गन्धर्वांश्च महाबलान्॥ 3 ॥

vasūnaṣṭau bhṛśaṃ sarvān yakṣarakṣomahoragān | vidyādharagaṇānsarvāngandharvāṃśca mahābalān

महार्णवांश्च शैलांश्च तथा रुद्रान् महौजसः ।यमवैश्रवणौ चोभौ वरुणं च जनाधिपं ४॥ ये तु सिद्धा महात्मानः पितरश्च मनस्विनः ।राजर्षयश्च शतशो योगसिद्धास्तथैव च॥ 5 ॥

mahārṇavāṃśca śailāṃśca tathā rudrān mahaujasaḥ | yamavaiśravaṇau cobhau varuṇaṃ ca janādhipaṃ 4|| ye tu siddhā mahātmānaḥ pitaraśca manasvinaḥ | rājarṣayaśca śataśo yogasiddhāstathaiva ca

त्रिदशाज्ञापकः शक्र आज्ञापयति वीर्यवान् ।भवन्तो दैत्यनाशाय सन्नह्यन्तामिति प्रभुः॥ 6 ॥

tridaśājñāpakaḥ śakra ājñāpayati vīryavān | bhavanto daityanāśāya sannahyantāmiti prabhuḥ

शक्रस्य वचनं श्रुत्वा ततः सर्वे दिवौकसः ।सन्नह्यन्त महात्मानः शक्रस्य समविक्रमाः॥ 7 ॥

śakrasya vacanaṃ śrutvā tataḥ sarve divaukasaḥ | sannahyanta mahātmānaḥ śakrasya samavikramāḥ

नानाकवचिनः सर्वे विचित्रकवचध्वजाः ।नानायुधोद्यतकरा मत्ता इव महागजाः॥ 8 ॥

nānākavacinaḥ sarve vicitrakavacadhvajāḥ | nānāyudhodyatakarā mattā iva mahāgajāḥ

केचिदारुरुहुर्व्याघ्रान् केचिदारुरुहुर्गजान् ।केचिदारुरुहुर्नागान् केचिदारुरुहुर्वृषान्॥ 9 ॥

kecidāruruhurvyāghrān kecidāruruhurgajān | kecidāruruhurnāgān kecidāruruhurvṛṣān

हरिनेत्रो हरिश्मश्रुर्द्विरदैरावृतध्वजम् ।रथं हरिहयैर्युक्तं स प्रायात् समरं प्रति॥ 10 ॥

harinetro hariśmaśrurdviradairāvṛtadhvajam | rathaṃ harihayairyuktaṃ sa prāyāt samaraṃ prati

आदित्यवर्णं विरजं सुधौतं त्वष्ट्रा स्वयं निर्मितमीश्वरार्थम् ।जालैश्च जाम्बूनदभक्तिचित्रै- रलङ्कृतं काञ्चनदामभिश्च॥ 11 ॥

ādityavarṇaṃ virajaṃ sudhautaṃ tvaṣṭrā svayaṃ nirmitamīśvarārtham | jālaiśca jāmbūnadabhakticitrai- ralaṅkṛtaṃ kāñcanadāmabhiśca

सकूबरोपस्करबन्धुरेषं विद्युत्प्रभाभिः कृतमाभिताम्रम् ।कैलासशृङ्गोपमन्द्रियानं सुचारुचारु प्रतिचक्रचक्रम्॥ 12 ॥

sakūbaropaskarabandhureṣaṃ vidyutprabhābhiḥ kṛtamābhitāmram | kailāsaśṛṅgopamandriyānaṃ sucārucāru praticakracakram

तारासहस्रैः खचितं ज्वलद्भि- र्देवार्हमाल्यार्चितसर्वदेहम् ।समुच्छ्रितश्रीध्वजमक्षयाक्षं प्रज्वाल्यमानं पुरुषोत्तमेन॥ 13 ॥

tārāsahasraiḥ khacitaṃ jvaladbhi- rdevārhamālyārcitasarvadeham | samucchritaśrīdhvajamakṣayākṣaṃ prajvālyamānaṃ puruṣottamena

आस्थाय तं भास्करमाशुवेगं शचीपतिर्लोकपतिः सुरेशः ।वज्रस्य धर्ता भुवनस्य गोप्ता ययौ महात्मा भगवान् महेन्द्रः॥ 14 ॥

āsthāya taṃ bhāskaramāśuvegaṃ śacīpatirlokapatiḥ sureśaḥ | vajrasya dhartā bhuvanasya goptā yayau mahātmā bhagavān mahendraḥ

आमुच्च वर्माथ सहस्रतारं हुताशनादित्यसमप्रभावम् ।सूर्यप्रभं चामुमुचे किरीटं मालां च जाम्बूनदवैजयन्तीम्॥ 15 ॥

āmucca varmātha sahasratāraṃ hutāśanādityasamaprabhāvam | sūryaprabhaṃ cāmumuce kirīṭaṃ mālāṃ ca jāmbūnadavaijayantīm

त्वष्ट्रा कृतं भास्कररश्मिदीप्तं सुतीक्ष्णघोरामलतीव्रधारम् ।महासुराणां रुधिरार्द्रमुग्रं प्रगृह्य वज्रं शतपर्व भीमम्॥ 16 ॥

tvaṣṭrā kṛtaṃ bhāskararaśmidīptaṃ sutīkṣṇaghorāmalatīvradhāram | mahāsurāṇāṃ rudhirārdramugraṃ pragṛhya vajraṃ śataparva bhīmam

महाशनी द्वे च महाग्रहाभे दीप्ताममोघां च सशक्तिमुग्राम् ।चक्रं तथैन्द्रं सुमहत्प्रतापं प्रगृह्य शक्रः प्रययौ रणाय॥ 17 ॥

mahāśanī dve ca mahāgrahābhe dīptāmamoghāṃ ca saśaktimugrām | cakraṃ tathaindraṃ sumahatpratāpaṃ pragṛhya śakraḥ prayayau raṇāya

सहस्रदृग् भूतपतिः सनातनः सनातनानामपि यः सनातनः ।खड्गं च देवाधिपतिर्महात्मा वैयाघ्रमादाय च चर्म चित्रम्॥ 18 ॥

sahasradṛg bhūtapatiḥ sanātanaḥ sanātanānāmapi yaḥ sanātanaḥ | khaḍgaṃ ca devādhipatirmahātmā vaiyāghramādāya ca carma citram

क्षीरोदधिक्षोभसमुच्छ्रितानि पुरामृतादुत्तमभूषणानि ।देवासुराणां श्रमनिर्जितानि सोमार्कनक्षत्रतडित्प्रभाणि॥ 19 ॥

kṣīrodadhikṣobhasamucchritāni purāmṛtāduttamabhūṣaṇāni | devāsurāṇāṃ śramanirjitāni somārkanakṣatrataḍitprabhāṇi

दत्तान्यदित्या मणिकुण्डलानि युद्धे प्रयातस्य सुरेश्वरस्य ।तैर्भूषितो भाति सहस्रचक्षु- रुद्योतयन् वै विदिशो दिशश्च॥ 20 ॥

dattānyadityā maṇikuṇḍalāni yuddhe prayātasya sureśvarasya | tairbhūṣito bhāti sahasracakṣu- rudyotayan vai vidiśo diśaśca

हरिः प्रभुर्नेत्रसहस्रचित्रो विभाति युद्धाभिमुखः सुरेन्द्रः ।यया सितं शारदमभ्रकल्पं नभस्तलं ह्यृक्षसहस्रचित्रम्॥ 21 ॥

hariḥ prabhurnetrasahasracitro vibhāti yuddhābhimukhaḥ surendraḥ | yayā sitaṃ śāradamabhrakalpaṃ nabhastalaṃ hyṛkṣasahasracitram

स्तुवन्ति यान्तं विपुलैर्वचोभि- र्जयाशिषा चोर्जितसत्त्ववीर्यम् ।अत्रिर्वसिष्ठो जमदग्निरूर्वो बृहस्पतिर्नारदपर्वतौ च॥ 22 ॥

stuvanti yāntaṃ vipulairvacobhi- rjayāśiṣā corjitasattvavīryam | atrirvasiṣṭho jamadagnirūrvo bṛhaspatirnāradaparvatau ca

तमन्वयुर्देवगणा महेन्द्रं प्रयान्तमादित्यसमानवर्चसम् ।विश्वे च देवा मरुतस्तथैव साध्यास्तथाऽऽदित्यगणाश्च सर्वे॥ 23 ॥

tamanvayurdevagaṇā mahendraṃ prayāntamādityasamānavarcasam | viśve ca devā marutastathaiva sādhyāstathā''dityagaṇāśca sarve

ते देवराजस्य पुरन्दरस्य हयाश्च ये मातलिसङ्गृहीताः ।प्रयान्ति देवेश्वरमुद्वहन्तो नभस्तलं पद्भिरिवाक्षिपन्तः॥ 24 ॥

te devarājasya purandarasya hayāśca ye mātalisaṅgṛhītāḥ | prayānti deveśvaramudvahanto nabhastalaṃ padbhirivākṣipantaḥ

ब्रह्मर्षयश्चैव महर्षयश्च राजर्षयश्चाक्षयपुण्यलोकाः ।सर्वेऽनुजग्मुः सहसा ज्वलन्तं तेजोऽन्वितं शक्रममित्रसाहम्॥ 25 ॥

brahmarṣayaścaiva maharṣayaśca rājarṣayaścākṣayapuṇyalokāḥ | sarve'nujagmuḥ sahasā jvalantaṃ tejo'nvitaṃ śakramamitrasāham

प्रगृह्य शूलांश्च परश्वधांश्च दीप्तानि चापान्यशनीर्विचित्राः ।वर्माणि चामुच्य हिरण्मयानि प्रयान्ति सूर्यांशुसमप्रभाणि॥ 26 ॥

pragṛhya śūlāṃśca paraśvadhāṃśca dīptāni cāpānyaśanīrvicitrāḥ | varmāṇi cāmucya hiraṇmayāni prayānti sūryāṃśusamaprabhāṇi

तथा कुबेरोऽश्वसहस्रयुक्तं श्रेष्ठं रथं सर्वसहं महार्हम् ।दिव्यं समारुह्य रणाय यातो धनेश्वरो दीप्तगदाग्रहस्तः॥ 27 ॥

tathā kubero'śvasahasrayuktaṃ śreṣṭhaṃ rathaṃ sarvasahaṃ mahārham | divyaṃ samāruhya raṇāya yāto dhaneśvaro dīptagadāgrahastaḥ

निशाचराः पावकधूमकाया रक्षोवृषा रुद्रसखस्य तस्य ।विशालनानायुधदीप्तहस्ता यान्त्यप्रतो वैश्रवणस्य राज्ञः॥ 28 ॥

niśācarāḥ pāvakadhūmakāyā rakṣovṛṣā rudrasakhasya tasya | viśālanānāyudhadīptahastā yāntyaprato vaiśravaṇasya rājñaḥ

ते लोहिताक्षाः परिवार्य देवं व्रजन्ति भिन्नाञ्जनचूर्णवर्णाः ।यक्षोत्तमा यक्षपतिं धनेशं रक्षन्ति वै पाशगदासिदस्ताः॥ 29 ॥

te lohitākṣāḥ parivārya devaṃ vrajanti bhinnāñjanacūrṇavarṇāḥ | yakṣottamā yakṣapatiṃ dhaneśaṃ rakṣanti vai pāśagadāsidastāḥ

पुण्यः प्रभुः प्राणपतिर्जितात्मा वैवस्वतो धर्मभृतां वरिष्ठः ।तडिद्गणाभं शतवाजियुक्तं रथं समारोहत सूर्यकल्पम्॥ 30 ॥

puṇyaḥ prabhuḥ prāṇapatirjitātmā vaivasvato dharmabhṛtāṃ variṣṭhaḥ | taḍidgaṇābhaṃ śatavājiyuktaṃ rathaṃ samārohata sūryakalpam

तं लोकपालं पितरोऽनुजग्मु र्विविक्तपापा ज्वलितास्तपोभिः ।सर्वे च भूता भुवनप्रधाना नानायुधव्यग्रकराः सुभीमाः॥ 31 ॥

taṃ lokapālaṃ pitaro'nujagmu rviviktapāpā jvalitāstapobhiḥ | sarve ca bhūtā bhuvanapradhānā nānāyudhavyagrakarāḥ subhīmāḥ

दण्डं महास्त्रं परिगृह्य देवो लोकाङ्कुशं निग्रहनिश्चितार्थम् ।हिरण्मयानां कमलोत्पलानां मालां मनोज्ञामवसज्य कण्ठे॥ 32 ॥

daṇḍaṃ mahāstraṃ parigṛhya devo lokāṅkuśaṃ nigrahaniścitārtham | hiraṇmayānāṃ kamalotpalānāṃ mālāṃ manojñāmavasajya kaṇṭhe

स्थितोऽस्थिमेदामिषलोहितार्द्रं सर्वासुराणां निधनं विरूपम् ।तेजोमयं मुद्गरमुग्ररूपं विकर्षमाणोऽरुणधूम्रनेत्रः॥ 33 ॥

sthito'sthimedāmiṣalohitārdraṃ sarvāsurāṇāṃ nidhanaṃ virūpam | tejomayaṃ mudgaramugrarūpaṃ vikarṣamāṇo'ruṇadhūmranetraḥ

समन्वितो व्याधिशतैरनेकै- र्ययौ हरिश्मश्रुरुदारसत्त्वः ।महासुराणां निधनाय बुद्धिं चक्रे तदा व्याधिपतिः कृतान्तः॥ 34 ॥

samanvito vyādhiśatairanekai- ryayau hariśmaśrurudārasattvaḥ | mahāsurāṇāṃ nidhanāya buddhiṃ cakre tadā vyādhipatiḥ kṛtāntaḥ

ततस्त्रिशीर्षैर्भुजगैर्बृहद्भि- र्युक्तं रथं हेमचितं महात्मा ।आस्थाय कुन्देन्दुनिभं जलेशो ययौ रणायासुरदर्पहन्ता॥ 35 ॥

tatastriśīrṣairbhujagairbṛhadbhi- ryuktaṃ rathaṃ hemacitaṃ mahātmā | āsthāya kundendunibhaṃ jaleśo yayau raṇāyāsuradarpahantā

वैदूर्यमुक्तामणिभूषिताङ्ग स्तेजोमयः पाशगृहीतहस्तः ।महासुराणां निधनाय देवः प्रयाति रूप्याङ्गदबद्धबाहुः॥ 36 ॥

vaidūryamuktāmaṇibhūṣitāṅga stejomayaḥ pāśagṛhītahastaḥ | mahāsurāṇāṃ nidhanāya devaḥ prayāti rūpyāṅgadabaddhabāhuḥ

अन्वीयमानो जलदेवताभि- र्निषेच्यमाणो जलजैश्च सत्त्वैः ।संस्तूयमानश्च महर्षिवृन्दैः सम्पूज्यमानश्च महाभुजङ्गैः॥ 37 ॥

anvīyamāno jaladevatābhi- rniṣecyamāṇo jalajaiśca sattvaiḥ | saṃstūyamānaśca maharṣivṛndaiḥ sampūjyamānaśca mahābhujaṅgaiḥ

कैलासशृङ्गप्रतिमोऽप्रमेयः समुद्रनाथोऽमृतपो महात्मा ।महोरगैः स्वैस्तनयैः सुगुप्तो ययौ रथेनार्कसमप्रभेण॥ 38 ॥

kailāsaśṛṅgapratimo'prameyaḥ samudranātho'mṛtapo mahātmā | mahoragaiḥ svaistanayaiḥ sugupto yayau rathenārkasamaprabheṇa

युद्धाय तं यान्तमदीनसत्त्वं नभस्तले चन्द्रमिवातिकान्तम् ।पश्यन्ति भूतानि महानुभावं संहृष्टरोमाणि कृताञ्जलीनि॥ 39 ॥

yuddhāya taṃ yāntamadīnasattvaṃ nabhastale candramivātikāntam | paśyanti bhūtāni mahānubhāvaṃ saṃhṛṣṭaromāṇi kṛtāñjalīni

धातार्यमांशोऽथ भगो विवस्त्रान् पर्जन्यमित्रौ च शशी च देवः ।त्वष्टा तथैवोर्जितविश्वकर्मा पूषा च साक्षाद् दिवि देवराजः॥ 40 ॥

dhātāryamāṃśo'tha bhago vivastrān parjanyamitrau ca śaśī ca devaḥ | tvaṣṭā tathaivorjitaviśvakarmā pūṣā ca sākṣād divi devarājaḥ

सोरश्छदैः सध्वजकिङ्किणीकै- र्वैदूर्यनिष्कैश्चितहेमकण्ठैः ।हयैर्वरैः शक्ररथप्रकाशै- र्युक्तान् रथानारुरुहुः सुरास्ते॥ 41 ॥

soraśchadaiḥ sadhvajakiṅkiṇīkai- rvaidūryaniṣkaiścitahemakaṇṭhaiḥ | hayairvaraiḥ śakrarathaprakāśai- ryuktān rathānāruruhuḥ surāste

दिवाकराकारनिभानि केचि- द्धुताशनार्चिः प्रतिमानि केचित् ।निशाकरांशुप्रतिमानि केचित् तडिद्गणोद्द्योतनिभानि केचित्॥ 42 ॥

divākarākāranibhāni keci- ddhutāśanārciḥ pratimāni kecit | niśākarāṃśupratimāni kecit taḍidgaṇoddyotanibhāni kecit

नीलांशुमेघप्रतिमानि केचित् कार्ष्णायसाकारनिभानि केचित् ।वर्माणि दिव्यानि महाप्रभाणि त्वष्ट्रा कृतान्युत्तमभानुमन्ति॥ 43 ॥

nīlāṃśumeghapratimāni kecit kārṣṇāyasākāranibhāni kecit | varmāṇi divyāni mahāprabhāṇi tvaṣṭrā kṛtānyuttamabhānumanti

आमुच्य मालाश्च सुवर्णपुष्पाः प्रयान्ति तोयानिलतुल्यवेगाः ।द्वावश्विनौ चैव महानुभावौ रूपोत्तमौ धर्मभृतां वरिष्ठौ॥ 44 ॥

āmucya mālāśca suvarṇapuṣpāḥ prayānti toyānilatulyavegāḥ | dvāvaśvinau caiva mahānubhāvau rūpottamau dharmabhṛtāṃ variṣṭhau

रथं समारुह्य सुवर्णचित्रं रणं गतौ काञ्चनतुल्यवर्णौ ।मनोः सुता वै वसवश्च सर्वे बलोत्कटा दैत्यवधाय देवाः॥ 45 ॥

rathaṃ samāruhya suvarṇacitraṃ raṇaṃ gatau kāñcanatulyavarṇau | manoḥ sutā vai vasavaśca sarve balotkaṭā daityavadhāya devāḥ

रथांश्च नागांश्च महाप्रमाणा- नास्थाय जग्मुः सुशुभास्त्रहस्ताः ।रुद्राश्च सर्वेऽरुणधूमवर्णाः श्वेतैर्ययुर्गोपतिभिर्बृहद्भिः॥ 46 ॥

rathāṃśca nāgāṃśca mahāpramāṇā- nāsthāya jagmuḥ suśubhāstrahastāḥ | rudrāśca sarve'ruṇadhūmavarṇāḥ śvetairyayurgopatibhirbṛhadbhiḥ

महौजसः सर्वगुणोपपन्ना दीप्तात्न्मनो भाभिरिव ज्वलन्तः ।नानायुधव्यग्रकरैर्भुजैस्तै र्लोकान् समस्तानिव निर्दहन्तः॥ 47 ॥

mahaujasaḥ sarvaguṇopapannā dīptātnmano bhābhiriva jvalantaḥ | nānāyudhavyagrakarairbhujaistai rlokān samastāniva nirdahantaḥ

ययुः ससैन्यास्तपनीयनद्धाः सविद्युतस्तोयधरा यथैव ।विश्वे च देवास्तपसा ज्वलन्तो वीर्योत्तमाः सूर्यमरीचिवर्णाः॥ 48 ॥

yayuḥ sasainyāstapanīyanaddhāḥ savidyutastoyadharā yathaiva | viśve ca devāstapasā jvalanto vīryottamāḥ sūryamarīcivarṇāḥ

ययुः ससैन्या युधि दुर्निवार्या बलोत्कटाः पद्मसहस्रमालाः ।रथैः सुयुक्तैस्तपनीयवर्णै- र्वैदूर्यमुक्तामणिदामचित्रैः॥ 49 ॥

yayuḥ sasainyā yudhi durnivāryā balotkaṭāḥ padmasahasramālāḥ | rathaiḥ suyuktaistapanīyavarṇai- rvaidūryamuktāmaṇidāmacitraiḥ

नानाविधाकारसमाकुलास्ते पारिप्लवैश्चैव सितातपत्रैः ।तेजोमयैः काञ्चनचारुचित्रैः सुनिर्मलैः पावकसन्निभास्ते॥ 50 ॥

nānāvidhākārasamākulāste pāriplavaiścaiva sitātapatraiḥ | tejomayaiḥ kāñcanacārucitraiḥ sunirmalaiḥ pāvakasannibhāste

सोरश्छदैः सध्वजकिङ्किणीकै- र्हयैश्च वायोः समवेगवद्भिः ।दिशां गजैश्चैव महाबलैस्तैः कैलासशृङ्गप्रतिमैर्महद्भिः॥ 51 ॥

soraśchadaiḥ sadhvajakiṅkiṇīkai- rhayaiśca vāyoḥ samavegavadbhiḥ | diśāṃ gajaiścaiva mahābalaistaiḥ kailāsaśṛṅgapratimairmahadbhiḥ

प्रजग्मुरुग्रायुधचापहस्ता- श्चतुर्युगान्ते ज्वलिता इवोल्काः ।साध्याश्च देवाः सुमहाप्रभावाः स्वाधीनचक्राः प्रतिदीप्तवक्त्राः॥ 52 ॥

prajagmurugrāyudhacāpahastā- ścaturyugānte jvalitā ivolkāḥ | sādhyāśca devāḥ sumahāprabhāvāḥ svādhīnacakrāḥ pratidīptavaktrāḥ

प्रयान्ति जाम्बूनदभूषिताङ्गा गाङ्गौघमात्रैर्गगनैर्बलौघैः ।विद्योतयन्तो विदिशो दिशश्च महाबलास्ते जयतां वरिष्ठाः॥ 53 ॥

prayānti jāmbūnadabhūṣitāṅgā gāṅgaughamātrairgaganairbalaughaiḥ | vidyotayanto vidiśo diśaśca mahābalāste jayatāṃ variṣṭhāḥ

वरिष्ठपुष्टाष्टभुजाः सुदृप्ता वैश्वानरार्कप्रतिमप्रभावाः ।ते ब्रह्मविद्भिश्च नमस्यमानाः सम्पूज्यमानाश्च सुरैः सशक्रैः॥ 54 ॥

variṣṭhapuṣṭāṣṭabhujāḥ sudṛptā vaiśvānarārkapratimaprabhāvāḥ | te brahmavidbhiśca namasyamānāḥ sampūjyamānāśca suraiḥ saśakraiḥ

गन्धर्वसङ्घैरनुगम्यमाना वधाय तेषामसुराधिपानाम् ।वैदूर्यवज्रस्फटिकाग्रचित्रै- र्ध्वजैः सुवर्णैश्च परिष्कृतानाम्॥ 55 ॥

gandharvasaṅghairanugamyamānā vadhāya teṣāmasurādhipānām | vaidūryavajrasphaṭikāgracitrai- rdhvajaiḥ suvarṇaiśca pariṣkṛtānām

रूपं बभौ चोत्कटभूषणानां दैत्येन्द्रनाशाय विभूषितानाम् ।आत्मप्रभाभिश्च रणोत्कटाभि- र्वर्मप्रभाभिश्च तमोनुदाभिः॥ 56 ॥

rūpaṃ babhau cotkaṭabhūṣaṇānāṃ daityendranāśāya vibhūṣitānām | ātmaprabhābhiśca raṇotkaṭābhi- rvarmaprabhābhiśca tamonudābhiḥ

ध्वजोत्थभाभिः स्वशरोरुभाभि- र्महाप्रभाभिश्च महोज्ज्वलाभिः ।विभान्ति ते देववराः ससाध्याः प्रध्मातशङ्खस्वनसिंहनादाः॥ 57 ॥

dhvajotthabhābhiḥ svaśarorubhābhi- rmahāprabhābhiśca mahojjvalābhiḥ | vibhānti te devavarāḥ sasādhyāḥ pradhmātaśaṅkhasvanasiṃhanādāḥ

महारथस्थास्त्रिदिवौकसस्ते महाबलाः शत्रुबलं प्रयान्ति ।महास्त्रहस्ता ययुरुग्रकाया महासुराणां निधनाय देवाः॥ 58 ॥

mahārathasthāstridivaukasaste mahābalāḥ śatrubalaṃ prayānti | mahāstrahastā yayurugrakāyā mahāsurāṇāṃ nidhanāya devāḥ

तथैव सर्वे मरुतोऽतिवीर्या बलोत्कटास्ते समरं प्रतीताः ।ययुर्महामेघसमानवर्णा- श्चक्रायुधास्तोयदनादनादाः॥ 59 ॥

tathaiva sarve maruto'tivīryā balotkaṭāste samaraṃ pratītāḥ | yayurmahāmeghasamānavarṇā- ścakrāyudhāstoyadanādanādāḥ

महेन्द्रकेतुप्रतिमा महाबलाः प्रगृह्य सर्वासुरसूदनां गदाम् ।रणोत्कटा लोहितचन्दनाक्ताः सहेममाल्याम्बरभूषिताङ्गाः॥ 60 ॥

mahendraketupratimā mahābalāḥ pragṛhya sarvāsurasūdanāṃ gadām | raṇotkaṭā lohitacandanāktāḥ sahemamālyāmbarabhūṣitāṅgāḥ

ते युद्धशौण्डाः सभुजास्त्रवीर्या बलोत्कटाः क्रोधविलोहिताक्षाः ।ययुः सजाम्बूनदपद्ममाला यथेष्टनानाविधकामरूपाः॥ 61 ॥

te yuddhaśauṇḍāḥ sabhujāstravīryā balotkaṭāḥ krodhavilohitākṣāḥ | yayuḥ sajāmbūnadapadmamālā yatheṣṭanānāvidhakāmarūpāḥ

खड्गप्रभाश्यामलितांसपीठाः पुरन्दरं वै परिवार्य देवाः ।वैदूर्यचामीकरचारुरूपा- ण्याबध्य गात्रेषु महाप्रभाणि॥ 62 ॥

khaḍgaprabhāśyāmalitāṃsapīṭhāḥ purandaraṃ vai parivārya devāḥ | vaidūryacāmīkaracārurūpā- ṇyābadhya gātreṣu mahāprabhāṇi

वर्माणि दैत्यास्त्रनिवारणानि प्रयान्ति युद्धाय सपत्नसाहाः ।तैरुत्थितैः काञ्चनवेदिकाढ्यै- र्वरध्वजैर्भास्कररश्मिवर्णैः॥ 63 ॥

varmāṇi daityāstranivāraṇāni prayānti yuddhāya sapatnasāhāḥ | tairutthitaiḥ kāñcanavedikāḍhyai- rvaradhvajairbhāskararaśmivarṇaiḥ

ययौ सुराणां पृतनोग्रभासा समुन्नदन्ती युधि सिंहनादान् ।इत्येवमुक्तं त्रिदिवेश्वरस्य सैन्यं तदासीत् सुमहत्प्रभावम्॥ 64 ॥

yayau surāṇāṃ pṛtanograbhāsā samunnadantī yudhi siṃhanādān | ityevamuktaṃ tridiveśvarasya sainyaṃ tadāsīt sumahatprabhāvam

युद्धं प्रयातस्य जयावहस्य वधाय तेषामसुराधिपानाम्॥ 65 ॥

yuddhaṃ prayātasya jayāvahasya vadhāya teṣāmasurādhipānām