Parva 2, Adhyāya 79

पुण्यकव्रतसम्बन्धी नियमस्य एवं दानस्य वर्णनं एवं पुत्रादिनिमित्ते क्रियमाणानि अन्यानि व्रतदानादीनां प्रतिपादनं उमोवाच ।विधिनैतेन कृत्स्नेन स्त्री सदा भर्तृदेवता ।चरेत् संवत्सरं दान्ता षण्मासान् मासमेव च॥ 1 ॥

puṇyakavratasambandhī niyamasya evaṃ dānasya varṇanaṃ evaṃ putrādinimitte kriyamāṇāni anyāni vratadānādīnāṃ pratipādanaṃ umovāca | vidhinaitena kṛtsnena strī sadā bhartṛdevatā | caret saṃvatsaraṃ dāntā ṣaṇmāsān māsameva ca

स्त्रियो ह्यावाहयेत् साध्वीरेकादश समाधिना ।स्वयं चैव विधिर्दृष्टो व्रतकानां मया शुभः॥ 2 ॥

striyo hyāvāhayet sādhvīrekādaśa samādhinā | svayaṃ caiva vidhirdṛṣṭo vratakānāṃ mayā śubhaḥ

अद्भिर्दद्यात् सतीः सर्वा या मूलव्रतिनी भवेत् ।तासां तु निष्क्रयो देयः कालदेशानुरूपतः॥ 3 ॥

adbhirdadyāt satīḥ sarvā yā mūlavratinī bhavet | tāsāṃ tu niṣkrayo deyaḥ kāladeśānurūpataḥ

ततो मासान्तशुक्लस्य तिथौ च नवमी तथा ।आराधयित्वा कर्तव्यं व्रतकस्यापवर्जनम्॥ 4 ॥

tato māsāntaśuklasya tithau ca navamī tathā | ārādhayitvā kartavyaṃ vratakasyāpavarjanam

उपवासमहोरात्रं व्रतकं चापि निश्चितम् ।आदौ चान्ते च कुर्वीत व्रतकस्यापि सिद्धये॥ 5 ॥

upavāsamahorātraṃ vratakaṃ cāpi niścitam | ādau cānte ca kurvīta vratakasyāpi siddhaye

क्षुरकर्म ततो भर्तुरात्मनश्चैव कारयेत् ।उत्सादनं च स्नानं च तस्मिन्नहनि संस्मृतम्॥ 6 ॥

kṣurakarma tato bharturātmanaścaiva kārayet | utsādanaṃ ca snānaṃ ca tasminnahani saṃsmṛtam

ततो विवाहवत्स्नानं विहितं पुण्यके शुभे ।मण्डनं चैव विहितं माल्यधारणमेव च॥ 7 ॥

tato vivāhavatsnānaṃ vihitaṃ puṇyake śubhe | maṇḍanaṃ caiva vihitaṃ mālyadhāraṇameva ca

कुम्भैस्तु स्नाप्यमानेमं साध्वी मन्त्रमुदीरयेत् ।भर्तुः पादौ नमस्कृत्य मनसा वाथ वा गिरा॥ 8 ॥

kumbhaistu snāpyamānemaṃ sādhvī mantramudīrayet | bhartuḥ pādau namaskṛtya manasā vātha vā girā

आपो देव्य ऋषीणां हि विश्वधात्र्यो दिव्या मदन्त्यो याः शङ्करा धर्मधात्र्यः ।हिरण्यवर्णाः पावकाः शिवतमेन रसेन श्रेयसो मां जुषन्तु॥ 9 ॥

āpo devya ṛṣīṇāṃ hi viśvadhātryo divyā madantyo yāḥ śaṅkarā dharmadhātryaḥ | hiraṇyavarṇāḥ pāvakāḥ śivatamena rasena śreyaso māṃ juṣantu

अपामेव स्मृतो मन्त्रः सर्वत्रान्यत्र मे शृणु ।मन्त्राः पुराणविहिताः स्त्रीणां सर्वाङ्गशोभने॥ 10 ॥

apāmeva smṛto mantraḥ sarvatrānyatra me śṛṇu | mantrāḥ purāṇavihitāḥ strīṇāṃ sarvāṅgaśobhane

शुभाव्यया गुणिनी युक्तधर्मा भर्त्रा साकं मम दास्या वरेण ।मा कर्मणा मनसा वापि वाचा भर्तुर्भवेयं रुषती स्यां वशङ्गा॥ 11 ॥

śubhāvyayā guṇinī yuktadharmā bhartrā sākaṃ mama dāsyā vareṇa | mā karmaṇā manasā vāpi vācā bharturbhaveyaṃ ruṣatī syāṃ vaśaṅgā

सपत्नीनामधि नित्यं भवेयं सपुत्रा स्यां सुभगा चारुरूपा ।सम्पन्नहस्ता गुणवादिनी च सर्वात्मना स्यां मा दरिद्रा भवेयम्॥ 12 ॥

sapatnīnāmadhi nityaṃ bhaveyaṃ saputrā syāṃ subhagā cārurūpā | sampannahastā guṇavādinī ca sarvātmanā syāṃ mā daridrā bhaveyam

पतिश्च मे स्यात् सुमुखो मत्प्रतीक्षो नित्यं मद्भक्तः स्यान्मन्मतिर्मद्गतिश्च ।प्रीतिश्च नौ स्याच्चक्रवाकानुरूपा मनोविरागो न भवेत्साधुवत्स्यात्॥ 13 ॥

patiśca me syāt sumukho matpratīkṣo nityaṃ madbhaktaḥ syānmanmatirmadgatiśca | prītiśca nau syāccakravākānurūpā manovirāgo na bhavetsādhuvatsyāt

लोकान्साध्वीनामुत्तमानां व्रजेयं याभिः सर्वं धार्यते विश्वरूपम् ।उभे कुले याः शुभाः पावयन्ति पितुर्भर्तुश्च पतिभक्त्योर्जिताश्च॥ 14 ॥

lokānsādhvīnāmuttamānāṃ vrajeyaṃ yābhiḥ sarvaṃ dhāryate viśvarūpam | ubhe kule yāḥ śubhāḥ pāvayanti piturbhartuśca patibhaktyorjitāśca

भूमिर्वायुर्जलमाकाशमग्निरन्तः क्षेत्रज्ञः प्रकृतिर्यो महांश्च ।अहङ्कारश्च मम साक्ष्ये नियुक्ताः स्मरेयुर्मे निश्चयं च व्रतं च॥ 15 ॥

bhūmirvāyurjalamākāśamagnirantaḥ kṣetrajñaḥ prakṛtiryo mahāṃśca | ahaṅkāraśca mama sākṣye niyuktāḥ smareyurme niścayaṃ ca vrataṃ ca

यैरारब्धो देहिनां भौतिकोऽयं विधिः सत्त्वाद्यैर्भूतयुक्तैः सबीजैः ।भवन्त्येते मे साक्षिणः सर्वसंस्था व्रते चास्मिन् निश्चये चापि नित्यम्॥ 16 ॥

yairārabdho dehināṃ bhautiko'yaṃ vidhiḥ sattvādyairbhūtayuktaiḥ sabījaiḥ | bhavantyete me sākṣiṇaḥ sarvasaṃsthā vrate cāsmin niścaye cāpi nityam

चन्द्रादित्यौ पुण्यसाक्षी यमश्च दिशः सर्वा दश चात्मा च मेऽयम् ।सन्त्वेते वै साक्षिणः सर्वसंस्था व्रते चास्मिन्निश्चये चापि नित्यम्॥ 17 ॥

candrādityau puṇyasākṣī yamaśca diśaḥ sarvā daśa cātmā ca me'yam | santvete vai sākṣiṇaḥ sarvasaṃsthā vrate cāsminniścaye cāpi nityam

मन्त्रैरेतैः पुराणोक्तैः सर्वद्रव्याभिमन्त्रणम् ।व्रतचर्यात् प्रभृति वै पुराणे समुदाहृतम्॥ 18 ॥

mantrairetaiḥ purāṇoktaiḥ sarvadravyābhimantraṇam | vratacaryāt prabhṛti vai purāṇe samudāhṛtam

स्नात्वाथ वाससी दद्याद्भर्तुः कर्त्य स्वयं शुभे ।अथात्मकर्तितं न स्याच्छुभे विघ्नेन केनचित्॥ 19 ॥

snātvātha vāsasī dadyādbhartuḥ kartya svayaṃ śubhe | athātmakartitaṃ na syācchubhe vighnena kenacit

वासोऽन्यदेव दद्याच्च श्वेतं मुख्यं नवं शुचि ।स्वकर्तितं च सूत्रं तु वाससा तेन मिश्रयेत्॥ 20 ॥

vāso'nyadeva dadyācca śvetaṃ mukhyaṃ navaṃ śuci | svakartitaṃ ca sūtraṃ tu vāsasā tena miśrayet

ततो द्विजं शुचिं दान्तं ज्ञानविज्ञानकोविदम् ।भोजयेच्च यथाशक्त्या सह भर्त्रा सुमध्यमे॥ 21 ॥

tato dvijaṃ śuciṃ dāntaṃ jñānavijñānakovidam | bhojayecca yathāśaktyā saha bhartrā sumadhyame

ब्राह्मणस्यापि दातव्यं वासोयुग्मं महातपे ।शय्यासनं गृहं धान्यं दासं दासीं तथैव च॥ 22 ॥

brāhmaṇasyāpi dātavyaṃ vāsoyugmaṃ mahātape | śayyāsanaṃ gṛhaṃ dhānyaṃ dāsaṃ dāsīṃ tathaiva ca

अलङ्कारः शक्तितश्च रत्नपर्वत एव च ।सर्वथान्यसमुन्मिश्रस्तिलैश्च सविशेषतः॥ 23 ॥

alaṅkāraḥ śaktitaśca ratnaparvata eva ca | sarvathānyasamunmiśrastilaiśca saviśeṣataḥ

वासोभिश्च प्रतिच्छन्नो नानावर्णैररुन्धति ।हस्त्यश्वावचयश्चैव देया गौरेव च धुवम्॥ 24 ॥

vāsobhiśca praticchanno nānāvarṇairarundhati | hastyaśvāvacayaścaiva deyā gaureva ca dhuvam

लवणप्रतिमां दद्यान्नवनीतस्य चापराम् ।गुडस्य मधुनश्चैव सुवर्णस्य च शोभनाम्॥ 25 ॥

lavaṇapratimāṃ dadyānnavanītasya cāparām | guḍasya madhunaścaiva suvarṇasya ca śobhanām

तथैव सर्वगन्धानां रसानां पृथगेव च ।तथा सुमनसां दद्याद् रौप्यस्यौदुम्बरस्य च॥ 26 ॥

tathaiva sarvagandhānāṃ rasānāṃ pṛthageva ca | tathā sumanasāṃ dadyād raupyasyaudumbarasya ca

फलानां चैव सर्वेषां वाससामपि नन्दिनि ।चित्रप्रतिकृतिं चैव काष्ठस्य प्रतिमां तथा॥ 27 ॥

phalānāṃ caiva sarveṣāṃ vāsasāmapi nandini | citrapratikṛtiṃ caiva kāṣṭhasya pratimāṃ tathā

शिलां प्रतिकृतिं चैव दध्नोऽथ पयसस्तथा ।सर्पिषा दूर्वया चैव या चान्यामप्यभीप्सति॥ 28 ॥

śilāṃ pratikṛtiṃ caiva dadhno'tha payasastathā | sarpiṣā dūrvayā caiva yā cānyāmapyabhīpsati

कालदेशानुरूपं च देयं विभवतः सति ।अल्पं वा बहुलं वापि भर्तुश्छन्देन सर्वदा॥ 29 ॥

kāladeśānurūpaṃ ca deyaṃ vibhavataḥ sati | alpaṃ vā bahulaṃ vāpi bhartuśchandena sarvadā

तिलपात्रं प्रदातव्यं न देयं ननु शोभने ।गौस्त्ववश्यं प्रदातव्या कपिला कांस्यमेव च॥ 30 ॥

tilapātraṃ pradātavyaṃ na deyaṃ nanu śobhane | gaustvavaśyaṃ pradātavyā kapilā kāṃsyameva ca

कृष्णाजिनं च सुभगे सतिलं वाससान्वितम् ।आदर्शश्चैव कूर्चश्च तथाजिनमनिन्दिते॥ 31 ॥

kṛṣṇājinaṃ ca subhage satilaṃ vāsasānvitam | ādarśaścaiva kūrcaśca tathājinamanindite

एतद् दत्त्वा सर्वकामानाप्नोति वरवर्णिनि ।पुरोऽधिका पुत्रवती सुभगा रूपभागिनी॥ 32 ॥

etad dattvā sarvakāmānāpnoti varavarṇini | puro'dhikā putravatī subhagā rūpabhāginī

मृष्टहस्ता धनाढ्या च स्त्री भवत्यमलेक्षणा ।इच्छया लभते चैव कन्या रूपगुणान्विताः॥ 33 ॥

mṛṣṭahastā dhanāḍhyā ca strī bhavatyamalekṣaṇā | icchayā labhate caiva kanyā rūpaguṇānvitāḥ

भवन्ति सुभगाश्चर्यास्तथैव च पुरोऽधिकाः ।पुत्रवत्यो धनाढ्याश्च शीलवत्यश्च नित्यदा॥ 34 ॥

bhavanti subhagāścaryāstathaiva ca puro'dhikāḥ | putravatyo dhanāḍhyāśca śīlavatyaśca nityadā

अरुन्धति कृतं ह्येतन्मयैव प्रथमं यतः ।उमाव्रतकमित्येव ख्यातमत्र महीतले॥ 35 ॥

arundhati kṛtaṃ hyetanmayaiva prathamaṃ yataḥ | umāvratakamityeva khyātamatra mahītale

एतदेवोत्तमं स्त्रीणां व्रतं तस्मान् समाचरेत् ।सर्वकामानवाप्नोति दत्त्वैवैतदनिन्दिते॥ 36 ॥

etadevottamaṃ strīṇāṃ vrataṃ tasmān samācaret | sarvakāmānavāpnoti dattvaivaitadanindite

एतद्व्रतकरो ह्येव देवदेवो वृषध्वजः ।पुराभिषिक्तवान् सौम्ये प्रियार्थं मम सर्वकृत्॥ 37 ॥

etadvratakaro hyeva devadevo vṛṣadhvajaḥ | purābhiṣiktavān saumye priyārthaṃ mama sarvakṛt

व्रतकस्यावसानेऽथ देयं भोज्यं च नित्यदा ।स्त्रीणां कामाः प्रदेयाश्च सदृशाः कालदेशयोः॥ 38 ॥

vratakasyāvasāne'tha deyaṃ bhojyaṃ ca nityadā | strīṇāṃ kāmāḥ pradeyāśca sadṛśāḥ kāladeśayoḥ

एकैकस्य प्रदातव्यं व्रतकं वरवर्णिनि ।छन्दतो ब्राह्मणानां तु देयमन्नं सदक्षिणम्॥ 39 ॥

ekaikasya pradātavyaṃ vratakaṃ varavarṇini | chandato brāhmaṇānāṃ tu deyamannaṃ sadakṣiṇam

पायसं तत्र दातव्यं व्रतके नान्यदिष्यते ।नात्र प्राणिवधः कार्यः पुराणे नियता श्रुतिः॥ 40 ॥

pāyasaṃ tatra dātavyaṃ vratake nānyadiṣyate | nātra prāṇivadhaḥ kāryaḥ purāṇe niyatā śrutiḥ

अथ द्वितीयं वक्ष्यामि व्रतं सोमसमुद्भवे ।महादेवप्रसादेन दृष्टवत्यस्मि यच्छुभे॥ 41 ॥

atha dvitīyaṃ vakṣyāmi vrataṃ somasamudbhave | mahādevaprasādena dṛṣṭavatyasmi yacchubhe

सर्वाः पुत्रफला नार्यः सद्भिरेतदुदाहृतम् ।तस्मादन्विष्यती दद्यात् सपुत्रकरकाञ्छुभे॥ 42 ॥

sarvāḥ putraphalā nāryaḥ sadbhiretadudāhṛtam | tasmādanviṣyatī dadyāt saputrakarakāñchubhe

ज्येष्ठाषाढौ शुभौ मासौ पुरोक्तं विधिमाचरेत् ।अथवा ज्येष्ठमेवैकमाषाढं वा समाचरेत्॥ 43 ॥

jyeṣṭhāṣāḍhau śubhau māsau puroktaṃ vidhimācaret | athavā jyeṣṭhamevaikamāṣāḍhaṃ vā samācaret

ततो मासद्वये पूर्णे मासे वा वरवर्णिनि ।सपुत्रकरकान् दद्यात् फाणितप्रतिपूरितान्॥ 44 ॥

tato māsadvaye pūrṇe māse vā varavarṇini | saputrakarakān dadyāt phāṇitapratipūritān

सर्पिषः पयसश्चैव दध्नोऽथ मधुनोऽनघे ।जलस्य च तथा दद्यात् पूरयित्वा शशिप्रभे॥ 45 ॥

sarpiṣaḥ payasaścaiva dadhno'tha madhuno'naghe | jalasya ca tathā dadyāt pūrayitvā śaśiprabhe

एकस्मै ज्ञानवृद्धाय सुव्रताय जितात्मने ।सपुत्रकरकान् दद्याद् यावन्तो मनसः प्रियाः॥ 46 ॥

ekasmai jñānavṛddhāya suvratāya jitātmane | saputrakarakān dadyād yāvanto manasaḥ priyāḥ

इच्छेत स्त्री दुहितरं स्त्रीणां कामकरं ततः ।किञ्चिद्द्रव्यं सुताकामात् सुतां प्राप्नोत्यसंशयः॥ 47 ॥

iccheta strī duhitaraṃ strīṇāṃ kāmakaraṃ tataḥ | kiñciddravyaṃ sutākāmāt sutāṃ prāpnotyasaṃśayaḥ

गौर्वाथ काञ्चनं वापि दक्षिणार्थं प्रशस्यते ।विप्रस्याच्छादनं देयमवश्यं तु शुचिस्मिते॥ 48 ॥

gaurvātha kāñcanaṃ vāpi dakṣiṇārthaṃ praśasyate | viprasyācchādanaṃ deyamavaśyaṃ tu śucismite

यज्ञोपवीतं व्रतके दद्यान्नारी शुचिव्रता ।सपुत्रकरकाणां तु विधिरुक्तो विपश्चिता॥ 49 ॥

yajñopavītaṃ vratake dadyānnārī śucivratā | saputrakarakāṇāṃ tu vidhirukto vipaścitā

अपत्याख्यानयोगेन ब्राह्मणेभ्यः शुचिव्रता ।संवत्सरं सुसम्पूर्णं व्रतधर्मानुपालिनी॥ 50 ॥

apatyākhyānayogena brāhmaṇebhyaḥ śucivratā | saṃvatsaraṃ susampūrṇaṃ vratadharmānupālinī

करकानपि दद्याच्च पूर्णे संवत्सरे शुभे ।अनुज्ञया सदा भर्तुः सत्यवादिन्यरुन्धति॥ 51 ॥

karakānapi dadyācca pūrṇe saṃvatsare śubhe | anujñayā sadā bhartuḥ satyavādinyarundhati

सुवर्णसूत्रं विप्राय कौमुद्यां दातुमर्हति ।यज्ञोपवीतं विप्रस्य व्रतं संस्थाप्य कामिकम्॥ 52 ॥

suvarṇasūtraṃ viprāya kaumudyāṃ dātumarhati | yajñopavītaṃ viprasya vrataṃ saṃsthāpya kāmikam

यज्ञोपवीतं करकं दक्षिणां च स्वशक्तितः ।प्रयच्छती सती स्त्रीभ्यः सर्वान्कामान्समश्नुते॥ 53 ॥

yajñopavītaṃ karakaṃ dakṣiṇāṃ ca svaśaktitaḥ | prayacchatī satī strībhyaḥ sarvānkāmānsamaśnute

नवं न भक्षयेत् किञ्चिन्नारी धान्यमथो फलम् ।पुष्पाणि नोपयुञ्जीत यावदेवं समाचरेत्॥ 54 ॥

navaṃ na bhakṣayet kiñcinnārī dhānyamatho phalam | puṣpāṇi nopayuñjīta yāvadevaṃ samācaret

एकभक्तेन धर्मज्ञे पुण्यकं कर्तुमर्हति ।ब्राह्मणाय तथा देयं भर्तुश्च तदनन्तरम्॥ 55 ॥

ekabhaktena dharmajñe puṇyakaṃ kartumarhati | brāhmaṇāya tathā deyaṃ bhartuśca tadanantaram

एवं संवत्सरं कृत्वा सुभगा रूपशालिनी ।भवत्यविधवा चैव स्त्री धनस्य तथेश्वरी॥ 56 ॥

evaṃ saṃvatsaraṃ kṛtvā subhagā rūpaśālinī | bhavatyavidhavā caiva strī dhanasya tatheśvarī

वार्ताकानि न खादेद् या स्त्री पूर्णं परिवत्सरम् ।न सा पुत्रविनाशं हि पश्यतीत्यवगम्यताम्॥ 57 ॥

vārtākāni na khāded yā strī pūrṇaṃ parivatsaram | na sā putravināśaṃ hi paśyatītyavagamyatām

शशकं मृगमांसं वा नित्यमेव विवर्जयेत् ।नाप्नोति मरणं नारी प्राप्नोति पतिदेवताम्॥ 58 ॥

śaśakaṃ mṛgamāṃsaṃ vā nityameva vivarjayet | nāpnoti maraṇaṃ nārī prāpnoti patidevatām

अलाबुं वर्जयेन्नारी तथैवोत्पादिकामपि ।कलम्बीं काञ्चनं नाद्याद्या भर्तुः सुखमिच्छति॥ 59 ॥

alābuṃ varjayennārī tathaivotpādikāmapi | kalambīṃ kāñcanaṃ nādyādyā bhartuḥ sukhamicchati

पूर्णे संवत्सरे दद्यादेकैकं शाकमादृता ।सदक्षिणं पुत्रवती भवत्येका पुरोऽधिका॥ 60 ॥

pūrṇe saṃvatsare dadyādekaikaṃ śākamādṛtā | sadakṣiṇaṃ putravatī bhavatyekā puro'dhikā

अयं प्रक्षालयाना स्त्री स्वपादावेवमादितः ।प्रतिष्ठां लभते नित्यमुद्वेगं नाधिगच्छति॥ 61 ॥

ayaṃ prakṣālayānā strī svapādāvevamāditaḥ | pratiṣṭhāṃ labhate nityamudvegaṃ nādhigacchati

दिवा या सूर्यपूतेन वर्तयेत् स्त्री पतिव्रता ।एकं संवत्सरं पूर्णं रात्रावन्नं विवर्जयेत्॥ 62 ॥

divā yā sūryapūtena vartayet strī pativratā | ekaṃ saṃvatsaraṃ pūrṇaṃ rātrāvannaṃ vivarjayet

सा जीवपुत्रा सुभगा भवत्यमरवर्णिनि ।अधितिष्ठति सर्वाश्च सपत्न्यो नात्र संशयः॥ 63 ॥

sā jīvaputrā subhagā bhavatyamaravarṇini | adhitiṣṭhati sarvāśca sapatnyo nātra saṃśayaḥ

पूर्णे संवत्सरे दद्यात् सौवर्णं सूर्यमुत्तमम् ।ब्राह्मणायाभिरूपाय दरिद्राय यशस्विने॥ 64 ॥

pūrṇe saṃvatsare dadyāt sauvarṇaṃ sūryamuttamam | brāhmaṇāyābhirūpāya daridrāya yaśasvine

फलानि वाथ पुष्पाणि भक्ष्याण्यपि च सुव्रता ।दद्यादनस्तमितके चरितव्रतका तथा॥ 65 ॥

phalāni vātha puṣpāṇi bhakṣyāṇyapi ca suvratā | dadyādanastamitake caritavratakā tathā

या तथास्तमिते सूर्ये भुङ्क्ते स्त्री नियता सती ।चन्द्रनक्षत्रपूतानि भोज्यानि वरवर्णिनि॥ 66 ॥

yā tathāstamite sūrye bhuṅkte strī niyatā satī | candranakṣatrapūtāni bhojyāni varavarṇini

सा दद्यात् काञ्चनं चन्द्रं नक्षत्राणि ग्रहानपि ।अभिरूपाय विप्राय वासश्च लवणान्वितम्॥ 67 ॥

sā dadyāt kāñcanaṃ candraṃ nakṣatrāṇi grahānapi | abhirūpāya viprāya vāsaśca lavaṇānvitam

चन्द्रशीतलगात्री सा भवत्यमरवर्णिनी ।सुभगा दर्शनीया च पुत्रवत्यपि भाविनी॥ 68 ॥

candraśītalagātrī sā bhavatyamaravarṇinī | subhagā darśanīyā ca putravatyapi bhāvinī

पौर्णमास्यां तु सततं प्राप्ते सोमोदयेऽङ्गना ।अर्घ्यं दद्यात् सुमनसां साक्षतं सकुशं तथा॥ 69 ॥

paurṇamāsyāṃ tu satataṃ prāpte somodaye'ṅganā | arghyaṃ dadyāt sumanasāṃ sākṣataṃ sakuśaṃ tathā

यावकं च बलिं दद्याद् दध्ना च सह संयुतम् ।एवं या कुरुते नित्यं सर्वान्कामानवाप्नुयात्॥ 70 ॥

yāvakaṃ ca baliṃ dadyād dadhnā ca saha saṃyutam | evaṃ yā kurute nityaṃ sarvānkāmānavāpnuyāt

अदृष्ट्वा या तु नाश्नाति सूर्यं नारी पतिव्रता ।दुर्दिने वाथवा व्यभ्रे सेष्टान् कामानवाप्नुयात्॥ 71 ॥

adṛṣṭvā yā tu nāśnāti sūryaṃ nārī pativratā | durdine vāthavā vyabhre seṣṭān kāmānavāpnuyāt

काञ्चनं शक्तितो दद्यात्सा विप्राय मनस्विनी ।सुभगा दर्शनीया च भवत्यमरवर्णिनी॥ 72 ॥

kāñcanaṃ śaktito dadyātsā viprāya manasvinī | subhagā darśanīyā ca bhavatyamaravarṇinī