Skandha 11, Adhyāya 8

श्रीनारायण उवाच ।भूतशुद्धिप्रकारं च कथयामि महामुने ।मूलाधारात्समुत्थाय कुण्डलीं परदेवताम्॥ 1 ॥

śrīnārāyaṇa uvāca | bhūtaśuddhiprakāraṃ ca kathayāmi mahāmune | mūlādhārātsamutthāya kuṇḍalīṃ paradevatām

सुषुम्णामार्गमाश्रित्य ब्रह्मरन्ध्रगतां स्मरेत् ।जीवं ब्रह्मणि संयोज्य हंसमन्त्रेण साधकः॥ 2 ॥

suṣumṇāmārgamāśritya brahmarandhragatāṃ smaret | jīvaṃ brahmaṇi saṃyojya haṃsamantreṇa sādhakaḥ

पादादिजानुपर्यन्तं चतुष्कोणं सवज्रकम् ।लं बीजाख्यं स्वर्णवर्णं स्मरेदवनिमण्डलम्॥ 3 ॥

pādādijānuparyantaṃ catuṣkoṇaṃ savajrakam | laṃ bījākhyaṃ svarṇavarṇaṃ smaredavanimaṇḍalam

जान्वाद्यानाभिचन्द्रार्धनिभं पद्मद्वयाङ्कितम् ।वं बीजयुक्तं श्वेताभमम्भसो मण्डलं स्मरेत्॥ 4 ॥

jānvādyānābhicandrārdhanibhaṃ padmadvayāṅkitam | vaṃ bījayuktaṃ śvetābhamambhaso maṇḍalaṃ smaret

नाभेर्हृदयपर्यन्तं त्रिकोणं स्वस्तिकान्वितम् ।रं बीजेन युतं रक्तं स्मरेत्पावकमण्डलम्॥ 5 ॥

nābherhṛdayaparyantaṃ trikoṇaṃ svastikānvitam | raṃ bījena yutaṃ raktaṃ smaretpāvakamaṇḍalam

हृदो भूमध्यपर्यन्तं वृत्तं षड्बिन्दुलाञ्छितम् ।यं बीजयुक्तं धूम्राभं नभस्वन्मण्डलं स्मरेत्॥ 6 ॥

hṛdo bhūmadhyaparyantaṃ vṛttaṃ ṣaḍbindulāñchitam | yaṃ bījayuktaṃ dhūmrābhaṃ nabhasvanmaṇḍalaṃ smaret

आब्रह्मरन्ध्रं भ्रूमध्याद्वृत्तं स्वच्छं मनोहरम् ।हं बीजयुक्तमाकाशमण्डलं च विचिन्तयेत्॥ 7 ॥

ābrahmarandhraṃ bhrūmadhyādvṛttaṃ svacchaṃ manoharam | haṃ bījayuktamākāśamaṇḍalaṃ ca vicintayet

एवं भूतानि सञ्चिन्त्य प्रत्येकं संविलापयेत् ।भुवं जले जलं वह्नौ वह्निं वायौ नभस्यमुम्॥ 8 ॥

evaṃ bhūtāni sañcintya pratyekaṃ saṃvilāpayet | bhuvaṃ jale jalaṃ vahnau vahniṃ vāyau nabhasyamum

विलाप्य खमहङ्कारे महत्तत्त्वेऽप्यहङ्कृतिम् ।महान्तं प्रकृतौ मायामात्मनि प्रविलापयेत्॥ 9 ॥

vilāpya khamahaṅkāre mahattattve'pyahaṅkṛtim | mahāntaṃ prakṛtau māyāmātmani pravilāpayet

शुद्धसंविन्मयो भूत्वा चिन्तयेत्पापपूरुषम् ।वामकुक्षिस्थितं कृष्णमङ्गुष्ठपरिमाणकम्॥ 10 ॥

śuddhasaṃvinmayo bhūtvā cintayetpāpapūruṣam | vāmakukṣisthitaṃ kṛṣṇamaṅguṣṭhaparimāṇakam

ब्रह्महत्याशिरोयुक्तं कनकस्तेयबाहुकम् ।मदिरापानहृदयं गुरुतल्पकटीयुतम्॥ 11 ॥

brahmahatyāśiroyuktaṃ kanakasteyabāhukam | madirāpānahṛdayaṃ gurutalpakaṭīyutam

तत्संसर्गिपदद्वन्द्वमुपपातकमस्तकम् ।खड्गचर्मधरं कृष्णमधोवक्त्रं सुदुःसहम्॥ 12 ॥

tatsaṃsargipadadvandvamupapātakamastakam | khaḍgacarmadharaṃ kṛṣṇamadhovaktraṃ suduḥsaham

वायुबीजं स्मरन्वायुं सम्पूर्यैनं विशोषयेत् ।स्वशरीरयुतं मन्त्रो वह्निबीजेन निर्दहेत्॥ 13 ॥

vāyubījaṃ smaranvāyuṃ sampūryainaṃ viśoṣayet | svaśarīrayutaṃ mantro vahnibījena nirdahet

कुम्भके परिजप्तेन ततः पापनरोद्भवम् ।बहिर्भस्म समुत्सार्य वायुबीजेन रेचयेत्॥ 14 ॥

kumbhake parijaptena tataḥ pāpanarodbhavam | bahirbhasma samutsārya vāyubījena recayet

सुधाबीजेन देहोत्थं भस्म सम्प्लावयेत्सुधीः ।भूबीजेन घनीकृत्य भस्म तत्कनकाण्डवत्॥ 15 ॥

sudhābījena dehotthaṃ bhasma samplāvayetsudhīḥ | bhūbījena ghanīkṛtya bhasma tatkanakāṇḍavat

विशुद्धमुकुराकारं जपन्बीजं विहायसः ।मूर्धादिपादपर्यन्तान्यङ्गानि रचयेत्सुधीः॥ 16 ॥

viśuddhamukurākāraṃ japanbījaṃ vihāyasaḥ | mūrdhādipādaparyantānyaṅgāni racayetsudhīḥ

आकाशादीनि भूतानि पुनरुत्पादयेच्चितः ।सोऽहं मन्त्रेण चात्मानमानयेद्धृदयाम्बुजे॥ 17 ॥

ākāśādīni bhūtāni punarutpādayeccitaḥ | so'haṃ mantreṇa cātmānamānayeddhṛdayāmbuje

कुण्डलीजीवमादाय परसङ्गात्सुधामयम् ।संस्थाप्य हृदयाम्भोजे मूलाधारगतां स्मरेत्॥ 18 ॥

kuṇḍalījīvamādāya parasaṅgātsudhāmayam | saṃsthāpya hṛdayāmbhoje mūlādhāragatāṃ smaret

रक्ताम्भोधिस्थपोतोल्लसदरुण- सरोजाधिरूढा कराब्जैः शूलं कोदण्डमिक्षूद्भवमणिगुण- मप्यङ्कुशं पञ्चबाणान् ।बिभ्राणासृक्कपालं त्रिनयन- लसिता पीनवक्षोरुहाढ्या देवी बालार्कवर्णा भवतु सुखकरी प्राणशक्तिः परा नः॥ 19 ॥

raktāmbhodhisthapotollasadaruṇa- sarojādhirūḍhā karābjaiḥ śūlaṃ kodaṇḍamikṣūdbhavamaṇiguṇa- mapyaṅkuśaṃ pañcabāṇān | bibhrāṇāsṛkkapālaṃ trinayana- lasitā pīnavakṣoruhāḍhyā devī bālārkavarṇā bhavatu sukhakarī prāṇaśaktiḥ parā naḥ

एवं ध्यात्वा प्राणशक्तिं परमात्मस्वरूपिणीम् ।विभूतिधारणं कार्यं सर्वाधिकृतिसिद्धये॥ 20 ॥

evaṃ dhyātvā prāṇaśaktiṃ paramātmasvarūpiṇīm | vibhūtidhāraṇaṃ kāryaṃ sarvādhikṛtisiddhaye

विभूतेर्विस्तरं वक्ष्ये धारणे च महाफलम् ।श्रुतिस्मृतिप्रमाणोक्तं भस्मधारणमुत्तमम्॥ 21 ॥

vibhūtervistaraṃ vakṣye dhāraṇe ca mahāphalam | śrutismṛtipramāṇoktaṃ bhasmadhāraṇamuttamam