पद ७६

रामको गुलाम, नाम रामबोला राख्यौ राम, काम यहै, नाम द्वै हौं कबहूँ कहत हौं ।रोटी-लूगा नीके राखै, आगेहूकी बेद भाखै, भलो ह्वैहै तेरो, तातें आनँद लहत हौं॥ 1 ॥

rāmako gulāma, nāma rāmabolā rākhyau rāma, kāma yahai, nāma dvai hauṃ kabahū~ kahata hauṃ | roṭī-lūgā nīke rākhai, āgehūkī beda bhākhai, bhalo hvaihai tero, tāteṃ āna~da lahata hauṃ

बाँध्यौ हौं करम जड़ गरब गूढ़ निगड़, सुनत दुसह हौं तौ साँसति सहत हौं ।आरत-अनाथ-नाथ, कौसलपाल, कृपाल, लीन्हौं छीन दीन देख्यो दुरित दहत हौं॥ 2 ॥

bā~dhyau hauṃ karama jaḍa़ garaba gūḍha़ nigaḍa़, sunata dusaha hauṃ tau sā~sati sahata hauṃ | ārata-anātha-nātha, kausalapāla, kṛpāla, līnhauṃ chīna dīna dekhyo durita dahata hauṃ

बूझ्यौ ज्यों ही, कह्यो, मैं हूँ चेरो ह्वैहौं रावरो जू मेरो कोऊ कहूँ नाहिं, चरन गहत हौं ।मींजो गुरु पीठ, अपनाइ गहि बाँह, बोलि सेवक-सुखद, सदा बिरद बहत हौं॥ 3 ॥

būjhyau jyoṃ hī, kahyo, maiṃ hū~ cero hvaihauṃ rāvaro jū mero koū kahū~ nāhiṃ, carana gahata hauṃ | mīṃjo guru pīṭha, apanāi gahi bā~ha, boli sevaka-sukhada, sadā birada bahata hauṃ

लोग कहैं पोच, सो न सोच न सँकोच मेरे ब्याह न बरेखी, जाति-पाँति न चहत हौं ।तुलसी अकाज-काज राम ही के रीझे-खीझे, प्रीतिकी प्रतीति मन मुदित रहत हौं॥ 4 ॥

loga kahaiṃ poca, so na soca na sa~koca mere byāha na barekhī, jāti-pā~ti na cahata hauṃ | tulasī akāja-kāja rāma hī ke rījhe-khījhe, prītikī pratīti mana mudita rahata hauṃ