पद १९०

सहज सनेही रामसों तैं कियो न सहज सनेह ।तातें भव-भाजन भयो, सुनु अजहुँ सिखावन एह॥ 1 ॥

sahaja sanehī rāmasoṃ taiṃ kiyo na sahaja saneha | tāteṃ bhava-bhājana bhayo, sunu ajahu~ sikhāvana eha

ज्यों मुख मुकुर बिलोकिये अरु चित न रहै अनुहारि ।त्यों सेवतहुँ न आपने, ये मातु-पिता, सुत-नारि॥ 2 ॥

jyoṃ mukha mukura bilokiye aru cita na rahai anuhāri | tyoṃ sevatahu~ na āpane, ye mātu-pitā, suta-nāri

दै दै सुमन तिल बासिकै अरु खरि परिहरि रस लेत ।स्वारथ हित भूतल भरे, मन मेचक, तन सेत॥ 3 ॥

dai dai sumana tila bāsikai aru khari parihari rasa leta | svāratha hita bhūtala bhare, mana mecaka, tana seta

करि बीत्यो, अब करतु है करिबे हित मीत अपार ।कबहुँ न कोउ रघुबीर सो नेह निबाहनिहार॥ 4 ॥

kari bītyo, aba karatu hai karibe hita mīta apāra | kabahu~ na kou raghubīra so neha nibāhanihāra

जासों सब नातो फुरै, तासों न करी पहिचानि ।तातें कछु समुझ्यो नहीं, कहा लाभ कह हानि॥ 5 ॥

jāsoṃ saba nāto phurai, tāsoṃ na karī pahicāni | tāteṃ kachu samujhyo nahīṃ, kahā lābha kaha hāni

साँचो जान्यो झूठको, झूठे कहँ साँचो जानि ।को न गयो, को जात है, को न जैहै करि हितहानि॥ 6 ॥

sā~co jānyo jhūṭhako, jhūṭhe kaha~ sā~co jāni | ko na gayo, ko jāta hai, ko na jaihai kari hitahāni

बेद कह्यो, बुध कहत हैं, अरु हौंहुँ कहत हौं टेरि ।तुलसी प्रभु साँचो हितू, तू हियकी आँखिन हेरि॥ 7 ॥

beda kahyo, budha kahata haiṃ, aru hauṃhu~ kahata hauṃ ṭeri | tulasī prabhu sā~co hitū, tū hiyakī ā~khina heri