पद १७०

यों मन कबहूँ तुम्हहिं न लाग्यो ।ज्यों छल छाँड़ि सुभाव निरंतर रहत बिषय अनुराग्यो॥ 1 ॥

yoṃ mana kabahū~ tumhahiṃ na lāgyo | jyoṃ chala chā~ḍa़i subhāva niraṃtara rahata biṣaya anurāgyo

ज्यों चितई परनारि, सुने पातक-प्रपंच घर-घरके ।त्यों न साधु, सुरसरि-तरंग-निरमल गुनगन रघुबरके॥ 2 ॥

jyoṃ citaī paranāri, sune pātaka-prapaṃca ghara-gharake | tyoṃ na sādhu, surasari-taraṃga-niramala gunagana raghubarake

ज्यों नासा सुगंधरस-बस, रसना षटरस-रति मानी ।राम-प्रसाद-माल जूठन लगि त्यों न ललकि ललचानी॥ 3 ॥

jyoṃ nāsā sugaṃdharasa-basa, rasanā ṣaṭarasa-rati mānī | rāma-prasāda-māla jūṭhana lagi tyoṃ na lalaki lalacānī

चंदन-चंदबदनि-भूषन-पट ज्यों चह पाँवर परस्यो ।त्यों रघुपति-पद-पदुम-परस को तनु पातकी न तरस्यो॥ 4 ॥

caṃdana-caṃdabadani-bhūṣana-paṭa jyoṃ caha pā~vara parasyo | tyoṃ raghupati-pada-paduma-parasa ko tanu pātakī na tarasyo

ज्यों सब भाँति कुदेव कुठाकुर सेये बपु बचन हिये हूँ ।त्यों न राम सुकृतग्य जे सकुचत सकृत प्रनाम किये हूँ॥ 5 ॥

jyoṃ saba bhā~ti kudeva kuṭhākura seye bapu bacana hiye hū~ | tyoṃ na rāma sukṛtagya je sakucata sakṛta pranāma kiye hū~

चंचल चरन लोभ लगि लोलुप द्वार-द्वार जग बागे ।राम-सीय-आस्रमनि चलत त्यों भये न स्रमित अभागे॥ 6 ॥

caṃcala carana lobha lagi lolupa dvāra-dvāra jaga bāge | rāma-sīya-āsramani calata tyoṃ bhaye na sramita abhāge

सकल अंग पद-बिमुख नाथ मुख नामकी ओट लई है ।है तुलसिहिं परतीति एक प्रभु-मूरति कृपामई है॥ 7 ॥

sakala aṃga pada-bimukha nātha mukha nāmakī oṭa laī hai | hai tulasihiṃ paratīti eka prabhu-mūrati kṛpāmaī hai