पद १६४

जानत प्रीति-रीति रघुराई ।नाते सब हाते करि राखत, राम सनेह-सगाई॥ 1 ॥

jānata prīti-rīti raghurāī | nāte saba hāte kari rākhata, rāma saneha-sagāī

नेह निवाहि देह तजि दसरथ, कीरति अचल चलाई ।ऐसेहु पितु तें अधिक गीधपर ममता गुन गरुआई॥ 2 ॥

neha nivāhi deha taji dasaratha, kīrati acala calāī | aisehu pitu teṃ adhika gīdhapara mamatā guna garuāī

तिय-बिरही सुग्रीव सखा लखि प्रानप्रिया बिसराई ।रन पर्‌यो बंधु बिभीषन ही को, सोच हृदय अधिकाई॥ 3 ॥

tiya-birahī sugrīva sakhā lakhi prānapriyā bisarāī | rana par‌yo baṃdhu bibhīṣana hī ko, soca hṛdaya adhikāī

घर गुरुगृह प्रिय सदन सासुरे, भइ जब जहँ पहुनाई ।तब तहँ कहि सबरीके फलनिकी रुचि माधुरी न पाई॥ 4 ॥

ghara gurugṛha priya sadana sāsure, bhai jaba jaha~ pahunāī | taba taha~ kahi sabarīke phalanikī ruci mādhurī na pāī

सहज सरूप कथा मुनि बरनत रहत सकुचि सिर नाई ।केवट मीत कहे सुख मानत बानर बंधु बड़ाई॥ 5 ॥

sahaja sarūpa kathā muni baranata rahata sakuci sira nāī | kevaṭa mīta kahe sukha mānata bānara baṃdhu baḍa़āī

प्रेम-कनौड़ो रामसो प्रभु त्रिभुवन तिहुँकाल न भाई ।तेरो रिनी हौं कह्यो कपि सों ऐसी मानिहि को सेवकाई॥ 6 ॥

prema-kanauḍa़o rāmaso prabhu tribhuvana tihu~kāla na bhāī | tero rinī hauṃ kahyo kapi soṃ aisī mānihi ko sevakāī

तुलसी राम-सनेह-सील लखि, जो न भगति उर आई ।तौ तोहिं जनमि जाय जननी जड़ तनु-तरुनता गवाँई॥ 7 ॥

tulasī rāma-saneha-sīla lakhi, jo na bhagati ura āī | tau tohiṃ janami jāya jananī jaḍa़ tanu-tarunatā gavā~ī