पद १३६

जिव जबतें हरितें बिलगान्यो ।तबतें देह गेह निज जान्यो ॥ मायाबस स्वरूप बिसरायो ।तेहि भ्रमतें दारुन दुख पायो ॥ पायो जो दारुन दुसह दुख, सुख-लेस सपनेहुँ नहिं मिल्यो ।भव-सूल, सोक अनेक जेहि, तेहि पंथ तू हठि हठि चल्यो ॥ बहु जोनि जनम, जरा, बिपति, मतिमंद! हरि जान्यो नहीं ।श्रीराम बिनु बिश्राम मूढ़! बिचारु, लखि पायो कहीं॥ 1 ॥

jiva jabateṃ hariteṃ bilagānyo | tabateṃ deha geha nija jānyo || māyābasa svarūpa bisarāyo | tehi bhramateṃ dāruna dukha pāyo || pāyo jo dāruna dusaha dukha, sukha-lesa sapanehu~ nahiṃ milyo | bhava-sūla, soka aneka jehi, tehi paṃtha tū haṭhi haṭhi calyo || bahu joni janama, jarā, bipati, matimaṃda! hari jānyo nahīṃ | śrīrāma binu biśrāma mūḍha़! bicāru, lakhi pāyo kahīṃ

आनँद-सिंधु-मध्य तव बासा ।बिनु जाने कस मरसि पियासा ॥ मृग-भ्रम-बारि सत्य जिय जानी ।तहँ तू मगन भयो सुख मानी ॥ तहँ मगन मज्जसि, पान करि, त्रयकाल जल नाहीं जहाँ ।निज सहज अनुभव रूप तव खल! भूलि अब आयो तहाँ ॥ निरमल, निरंजन, निरबिकार, उदार सुख तैं परिहर्‌यो ।निःकाज राज बिहाय नृप इव सपन कारागृह पर्‌यो॥ 2 ॥

āna~da-siṃdhu-madhya tava bāsā | binu jāne kasa marasi piyāsā || mṛga-bhrama-bāri satya jiya jānī | taha~ tū magana bhayo sukha mānī || taha~ magana majjasi, pāna kari, trayakāla jala nāhīṃ jahā~ | nija sahaja anubhava rūpa tava khala! bhūli aba āyo tahā~ || niramala, niraṃjana, nirabikāra, udāra sukha taiṃ parihar‌yo | niḥkāja rāja bihāya nṛpa iva sapana kārāgṛha par‌yo

तैं निज करम-डोरि दृढ़ कीन्हीं ।अपने करनि गाँठि गहि दीन्हीं ॥ तातें परबस पर्‌यो अभागे ।ता फल गरभ-बास-दुख आगे ॥ आगे अनेक समूह संसृत उदरगत जान्यो सोऊ ।सिर हेठ, ऊपर चरन, संकट बात नहिं पूछै कोऊ ॥ सोनित-पुरीष जो मूत्र-मल क्रमि-कर्दमावृत सोवई ।कोमल सरीर, गँभीर बेदन, सीस धुनि-धुनि रोवई॥ 3 ॥

taiṃ nija karama-ḍori dṛḍha़ kīnhīṃ | apane karani gā~ṭhi gahi dīnhīṃ || tāteṃ parabasa par‌yo abhāge | tā phala garabha-bāsa-dukha āge || āge aneka samūha saṃsṛta udaragata jānyo soū | sira heṭha, ūpara carana, saṃkaṭa bāta nahiṃ pūchai koū || sonita-purīṣa jo mūtra-mala krami-kardamāvṛta sovaī | komala sarīra, ga~bhīra bedana, sīsa dhuni-dhuni rovaī

तू निज करम-जाल जहँ घेरो ।श्रीहरि संग तज्यो नहिं तेरो ॥ बहुबिधि प्रतिपालन प्रभु कीन्हों ।परम कृपालु ग्यान तोहि दीन्हों ॥ तोहि दियो ग्यान-बिबेक, जनम अनेककी तव सुधि भई ।तेहि ईसकी हौं सरन, जाकी बिषम माया गुनमई ॥ जेहि किये जीव-निकाय बस, रसहीन, दिन-दिन अति नई ।सो करौं बेगि सँभारि श्रीपति, बिपति महँ जेहि मति दई॥ 4 ॥

tū nija karama-jāla jaha~ ghero | śrīhari saṃga tajyo nahiṃ tero || bahubidhi pratipālana prabhu kīnhoṃ | parama kṛpālu gyāna tohi dīnhoṃ || tohi diyo gyāna-bibeka, janama anekakī tava sudhi bhaī | tehi īsakī hauṃ sarana, jākī biṣama māyā gunamaī || jehi kiye jīva-nikāya basa, rasahīna, dina-dina ati naī | so karauṃ begi sa~bhāri śrīpati, bipati maha~ jehi mati daī

पुनि बहुबिधि गलानि जिय मानी ।अब जग जाइ भजौं चक्रपानी ॥ ऐसेहि करि बिचार चुप साधी ।प्रसव-पवन प्रेरेउ अपराधी ॥ प्रेर्‌यो जो परम प्रचंड मारुत, कष्ट नाना तैं सह्यो ।सो ग्यान, ध्यान, बिराग, अनुभव जातना-पावक दह्यो ॥ अति खेद ब्याकुल, अलप बल, छिन एक बोलि न आवई ।तव तीव्र कष्ट न जान कोउ, सब लोग हरषित गावई॥ 5 ॥

puni bahubidhi galāni jiya mānī | aba jaga jāi bhajauṃ cakrapānī || aisehi kari bicāra cupa sādhī | prasava-pavana prereu aparādhī || prer‌yo jo parama pracaṃḍa māruta, kaṣṭa nānā taiṃ sahyo | so gyāna, dhyāna, birāga, anubhava jātanā-pāvaka dahyo || ati kheda byākula, alapa bala, china eka boli na āvaī | tava tīvra kaṣṭa na jāna kou, saba loga haraṣita gāvaī

बाल दसा जेते दुख पाये ।अति असीम, नहिं जाहिं गनाये ॥ छुधा-ब्याधि बाधा अति भारी ।बेदन नहिं जानै महतारी ॥ जननी न जानै पीर सो, केहि हेतु सिसु रोदन करै ।सोइ करै बिबिध उपाय, जातें अधिक तुव छाती जरै ॥ कौमार, सैसव अरु किसोर अपार अघ को कहि सकै ।ब्यतिरेक तोहि निरदय! महाखल! आन कहु को सहि सकै॥ 6 ॥

bāla dasā jete dukha pāye | ati asīma, nahiṃ jāhiṃ ganāye || chudhā-byādhi bādhā ati bhārī | bedana nahiṃ jānai mahatārī || jananī na jānai pīra so, kehi hetu sisu rodana karai | soi karai bibidha upāya, jāteṃ adhika tuva chātī jarai || kaumāra, saisava aru kisora apāra agha ko kahi sakai | byatireka tohi niradaya! mahākhala! āna kahu ko sahi sakai

जोवन जुवती सँग रँग रात्यो ।तब तू महा मोह-मद मात्यो ॥ तातें तजी धरम-मरजादा ।बिसरे तब सब प्रथम बिषादा ॥ बिसरे बिषाद, निकाय-संकट समुझि नहिं फाटत हियो ।फिरि गर्भगत-आवर्त संसृतिचक्र जेहि होइ सोइ कियो ॥ क्रमि-भस्म-बिट-परिनाम तनु, तेहि लागि जग बैरी भयो ।परदार, परधन, द्रोहपर, संसार बाढ़ै नित नयो॥ 7 ॥

jovana juvatī sa~ga ra~ga rātyo | taba tū mahā moha-mada mātyo || tāteṃ tajī dharama-marajādā | bisare taba saba prathama biṣādā || bisare biṣāda, nikāya-saṃkaṭa samujhi nahiṃ phāṭata hiyo | phiri garbhagata-āvarta saṃsṛticakra jehi hoi soi kiyo || krami-bhasma-biṭa-parināma tanu, tehi lāgi jaga bairī bhayo | paradāra, paradhana, drohapara, saṃsāra bāḍha़ai nita nayo

देखत ही आई बिरुधाई ।जो तैं सपनेहुँ नाहिं बुलाई ॥ ताके गुन कछु कहे न जाहीं ।सो अब प्रगट देखु तनु माहीं ॥ सो प्रगट तनु जरजर जराबस, ब्याधि, सूल सतावई ।सिर-कंप, इन्द्रिय-सक्ति प्रतिहत, बचन काहु न भावई ॥ गृहपालहूतें अति निरादर, खान-पान न पावई ।ऐसिहु दसा न बिराग तहँ, तृष्णा-तरंग बढ़ावई॥ 8 ॥

dekhata hī āī birudhāī | jo taiṃ sapanehu~ nāhiṃ bulāī || tāke guna kachu kahe na jāhīṃ | so aba pragaṭa dekhu tanu māhīṃ || so pragaṭa tanu jarajara jarābasa, byādhi, sūla satāvaī | sira-kaṃpa, indriya-sakti pratihata, bacana kāhu na bhāvaī || gṛhapālahūteṃ ati nirādara, khāna-pāna na pāvaī | aisihu dasā na birāga taha~, tṛṣṇā-taraṃga baḍha़āvaī

कहि को सकै महाभव तेरे ।जनम एकके कछुक गनेरे ॥ चारि खानि संतत अवगाहीं ।अजहुँ न करु बिचार मन माहीं ॥ अजहुँ बिचारु, बिकार तजि, भजु राम जन-सुखदायकं ।भवसिंधु दुस्तर जलरथं, भजु चक्रधर सुरनायकं ॥ बिनु हेतु करुनाकर, उदार, अपार-माया-तारनं ।कैवल्य-पति, जगपति, रमापति, प्रानपति, गतिकारनं॥ 9 ॥

kahi ko sakai mahābhava tere | janama ekake kachuka ganere || cāri khāni saṃtata avagāhīṃ | ajahu~ na karu bicāra mana māhīṃ || ajahu~ bicāru, bikāra taji, bhaju rāma jana-sukhadāyakaṃ | bhavasiṃdhu dustara jalarathaṃ, bhaju cakradhara suranāyakaṃ || binu hetu karunākara, udāra, apāra-māyā-tāranaṃ | kaivalya-pati, jagapati, ramāpati, prānapati, gatikāranaṃ

रघुपति-भगति सुलभ, सुखकारी ।सो त्रयताप-सोक-भय-हारी ॥ बिनु सतसंग भगति नहिं होई ।ते तब मिलैं द्रवै जब सोई ॥ जब द्रवै दीनदयालु राघव, साधु-संगति पाइये ।जेहि दरस-परस-समागमादिक पापरासि नसाइये ॥ जिनके मिले दुख-सुख समान, अमानतादिक गुन भये ।मद-मोह लोभ-बिषाद-क्रोध सुबोधतें सहजहिं गये॥ 10 ॥

raghupati-bhagati sulabha, sukhakārī | so trayatāpa-soka-bhaya-hārī || binu satasaṃga bhagati nahiṃ hoī | te taba milaiṃ dravai jaba soī || jaba dravai dīnadayālu rāghava, sādhu-saṃgati pāiye | jehi darasa-parasa-samāgamādika pāparāsi nasāiye || jinake mile dukha-sukha samāna, amānatādika guna bhaye | mada-moha lobha-biṣāda-krodha subodhateṃ sahajahiṃ gaye

सेवत साधु द्वैत-भय भागै ।श्रीरघुबीर-चरन लय लागै ॥ देह-जनित बिकार सब त्यागै ।तब फिरि निज स्वरूप अनुरागै ॥ अनुराग सो निज रूप जो जगतें बिलच्छन देखिये ।सन्तोष, सम, सीतल सदा दम, देहवंत न लेखिये ॥ निरमल, निरामय, एकरस, तेहि हरष-सोक न ब्यापई ।त्रैलोक-पावन सो सदा जाकी दसा ऐसी भई॥ 11 ॥

sevata sādhu dvaita-bhaya bhāgai | śrīraghubīra-carana laya lāgai || deha-janita bikāra saba tyāgai | taba phiri nija svarūpa anurāgai || anurāga so nija rūpa jo jagateṃ bilacchana dekhiye | santoṣa, sama, sītala sadā dama, dehavaṃta na lekhiye || niramala, nirāmaya, ekarasa, tehi haraṣa-soka na byāpaī | trailoka-pāvana so sadā jākī dasā aisī bhaī

जो तेहि पंथ चलै मन लाई ।तौ हरि काहे न होहिं सहाई ॥ जो मारग श्रुति-साधु दिखावै ।तेहि पथ चलत सबै सुख पावै ॥ पावै सदा सुख हरि-कृपा, संसार-आसा तजि रहै ।सपनेहुँ नहीं सुख द्वैत-दरसन, बात कोटिक को कहै ॥ द्विज, देव, गुरु, हरि, संत बिनु संसार-पार न पाइये ।यह जानि तुलसीदास त्रासहरन रमापति गाइये॥ 12 ॥

jo tehi paṃtha calai mana lāī | tau hari kāhe na hohiṃ sahāī || jo māraga śruti-sādhu dikhāvai | tehi patha calata sabai sukha pāvai || pāvai sadā sukha hari-kṛpā, saṃsāra-āsā taji rahai | sapanehu~ nahīṃ sukha dvaita-darasana, bāta koṭika ko kahai || dvija, deva, guru, hari, saṃta binu saṃsāra-pāra na pāiye | yaha jāni tulasīdāsa trāsaharana ramāpati gāiye