Parva 3, Adhyāya 99

बलभद्रस्य एकलव्येन सार्धं एवं पौण्ड्रकस्य सात्यकिना सार्धं युद्धं क्रव्यादाः सर्व एवाशु भक्षयन्तस्तदा शवम् ।हसन्तो विविधं घोरं नादयन्तो वसुन्धराम्॥ 1 ॥

balabhadrasya ekalavyena sārdhaṃ evaṃ pauṇḍrakasya sātyakinā sārdhaṃ yuddhaṃ kravyādāḥ sarva evāśu bhakṣayantastadā śavam | hasanto vividhaṃ ghoraṃ nādayanto vasundharām

राक्षसाश्च पिशाचाश्च पिबन्तः शोणितं बहु ।आशिखं भुञ्जते राजञ्छवस्य पिशिताशनाः॥ 2 ॥

rākṣasāśca piśācāśca pibantaḥ śoṇitaṃ bahu | āśikhaṃ bhuñjate rājañchavasya piśitāśanāḥ

नृत्यन्ति स्म तदा राजन् नगर्यां रणतोषिताः ।काका बलाका गृध्राश्च श्येना गोमायवस्तथा॥ 3 ॥

nṛtyanti sma tadā rājan nagaryāṃ raṇatoṣitāḥ | kākā balākā gṛdhrāśca śyenā gomāyavastathā

भक्षयन्तः प्रवर्तन्ते राक्षसाश्चैव दारुणाः ।एतस्मिन्नन्तरे वीरो निषादो लब्धसंज्ञकः॥ 4 ॥

bhakṣayantaḥ pravartante rākṣasāścaiva dāruṇāḥ | etasminnantare vīro niṣādo labdhasaṃjñakaḥ

हतान् सर्वान् समालोक्य निषादान् नगचारिणः ।गदामादाय कुपितो राममेव जगाम ह॥ 5 ॥

hatān sarvān samālokya niṣādān nagacāriṇaḥ | gadāmādāya kupito rāmameva jagāma ha

जघान गदया राजञ्जत्रुदेशे निषादपः ।ततो रामो गदी राजन् निषादं बाहुशालिनम्॥ 6 ॥

jaghāna gadayā rājañjatrudeśe niṣādapaḥ | tato rāmo gadī rājan niṣādaṃ bāhuśālinam

आजघ्ने गदया क्रूरं मदमत्तो हलायुधः ।तयोश्च तुमुलं युद्धं गदाभ्यां समवर्तत॥ 7 ॥

ājaghne gadayā krūraṃ madamatto halāyudhaḥ | tayośca tumulaṃ yuddhaṃ gadābhyāṃ samavartata

आकाशे शब्द आसीत् तु तयोर्युद्धे महाभुज ।समुद्राणां यथा घोषः सर्वेषां सन्निगच्छताम्॥ 8 ॥

ākāśe śabda āsīt tu tayoryuddhe mahābhuja | samudrāṇāṃ yathā ghoṣaḥ sarveṣāṃ sannigacchatām

कल्पक्षये महाराज शब्दः सुतुमुलोऽभवत् ।क्षोभितो नागराजश्च नागाः क्षोभं समाययुः॥ 9 ॥

kalpakṣaye mahārāja śabdaḥ sutumulo'bhavat | kṣobhito nāgarājaśca nāgāḥ kṣobhaṃ samāyayuḥ

पृथिवी चान्तरिक्षं च सर्वं शब्दमयं बभौ ।ततः स पौण्ड्रको राजा सात्यकिं वृष्णिनन्दनम्॥ 10 ॥

pṛthivī cāntarikṣaṃ ca sarvaṃ śabdamayaṃ babhau | tataḥ sa pauṇḍrako rājā sātyakiṃ vṛṣṇinandanam

गदयैव जघानाशु सत्वरं रणकोविदः ।युयुधानो बली राजन् वासुदेवं जघान ह॥ 11 ॥

gadayaiva jaghānāśu satvaraṃ raṇakovidaḥ | yuyudhāno balī rājan vāsudevaṃ jaghāna ha

तयोश्च तुमुलः शब्दः प्रादुरासीन्महारणे ।चतुर्णां युध्यतां राजन् परस्परवधैषिणाम्॥ 12 ॥

tayośca tumulaḥ śabdaḥ prādurāsīnmahāraṇe | caturṇāṃ yudhyatāṃ rājan parasparavadhaiṣiṇām

ब्रह्माण्डक्षोभणो राजञ्छब्द आसीत् सुदारुणः ।ततो रजः प्रादुरभूत् तस्मिन् सङ्ग्राममूर्धनि॥ 13 ॥

brahmāṇḍakṣobhaṇo rājañchabda āsīt sudāruṇaḥ | tato rajaḥ prādurabhūt tasmin saṅgrāmamūrdhani

तारका निष्प्रभा राजंस्तमस्येवं क्षयं गते ।उषसि प्रतिबुद्धायां ततो निःशेषतां ययौ॥ 14 ॥

tārakā niṣprabhā rājaṃstamasyevaṃ kṣayaṃ gate | uṣasi pratibuddhāyāṃ tato niḥśeṣatāṃ yayau

उदितो भगवान् सूर्यश्चन्द्रश्च क्षयमाययौ ।तेषां युद्धं प्रादुरभूच्चतुर्णां बाहुशालिनाम् ।देवासुरसमं राजन्नुदिते भास्करे महत्॥ 15 ॥

udito bhagavān sūryaścandraśca kṣayamāyayau | teṣāṃ yuddhaṃ prādurabhūccaturṇāṃ bāhuśālinām | devāsurasamaṃ rājannudite bhāskare mahat