Parva 3, Adhyāya 63

राजानं बलिं प्रति प्रह्लादस्य वचनं, बलिना देवसैन्योपरि आक्रमणं बृहस्पतेस्तु वचनं श्रुत्वा सत्यं समीरितम् ।भूयः प्रजज्वाल रणे हविषेव महामखे॥ 1 ॥

rājānaṃ baliṃ prati prahlādasya vacanaṃ, balinā devasainyopari ākramaṇaṃ bṛhaspatestu vacanaṃ śrutvā satyaṃ samīritam | bhūyaḥ prajajvāla raṇe haviṣeva mahāmakhe

हतास्तु माया दैत्यानां प्रदीप्तेनाग्निना रणे ।हतमाया हतबला बलिं ते समुपस्थिताः॥ 2 ॥

hatāstu māyā daityānāṃ pradīptenāgninā raṇe | hatamāyā hatabalā baliṃ te samupasthitāḥ

पराजितेषु दैत्येषु वह्निनाद्भुतकर्मणा ।प्रह्रादस्तूत्तरं वाक्यमाह दैत्यपतिं बलिम्॥ 3 ॥

parājiteṣu daityeṣu vahninādbhutakarmaṇā | prahrādastūttaraṃ vākyamāha daityapatiṃ balim

भवानग्निश्च वायुश्च भास्करः सलिलं शशी ।नक्षत्राणि दिशो व्योम भूश्च दानवसत्तम॥ 4 ॥

bhavānagniśca vāyuśca bhāskaraḥ salilaṃ śaśī | nakṣatrāṇi diśo vyoma bhūśca dānavasattama

भविष्यं चैव भूतं च भवच्चासुरसत्तम ।दत्तं चैतद् भागवता वरदेन स्वयम्भुवा॥ 5 ॥

bhaviṣyaṃ caiva bhūtaṃ ca bhavaccāsurasattama | dattaṃ caitad bhāgavatā varadena svayambhuvā

इन्द्रत्वं चामरत्वं च युद्धे चाप्यपराजयः ।ईशित्वं च वशित्वं च बलं चैवामितं शुभम्॥ 6 ॥

indratvaṃ cāmaratvaṃ ca yuddhe cāpyaparājayaḥ | īśitvaṃ ca vaśitvaṃ ca balaṃ caivāmitaṃ śubham

सर्वभूतेश्वरत्वं च दैत्यराज सदा तव ।महायोगीश्वरत्वं च शूरत्वं च महामृधे॥ 7 ॥

sarvabhūteśvaratvaṃ ca daityarāja sadā tava | mahāyogīśvaratvaṃ ca śūratvaṃ ca mahāmṛdhe

अणिमा लघिमा चैव ये चान्ये सात्त्विका गुणाः ।तत्पराजित्य दैत्येन्द्र देवान् सर्वांश्च सानुगान्॥ 8 ॥

aṇimā laghimā caiva ye cānye sāttvikā guṇāḥ | tatparājitya daityendra devān sarvāṃśca sānugān

यथोक्तं ब्रह्मणा राजंस्तत्तथा न तदन्यथा ।तस्य तद् वचनं श्रुत्वा प्रह्रादस्य महात्मनः ।बलिः परमसंहृष्टः प्रायाच्छक्ररथं प्रति॥ 9 ॥

yathoktaṃ brahmaṇā rājaṃstattathā na tadanyathā | tasya tad vacanaṃ śrutvā prahrādasya mahātmanaḥ | baliḥ paramasaṃhṛṣṭaḥ prāyācchakrarathaṃ prati

ततः प्रयान्तं त्रिदशेन्द्रसन्निधौ महासुरेन्द्रं बलिमुत्तमश्रियम् ।तमञ्जसा जग्मुरभिप्रदक्षिणं द्विजाश्च पुण्याः पशवश्च सत्तमाः॥ 10 ॥

tataḥ prayāntaṃ tridaśendrasannidhau mahāsurendraṃ balimuttamaśriyam | tamañjasā jagmurabhipradakṣiṇaṃ dvijāśca puṇyāḥ paśavaśca sattamāḥ

महाजटाभारधरास्तपस्विनस्तदा तमाहुर्विधिमन्त्रमङ्गलैः ।अभिष्टुवन्तः कवयः स्वलङ्कृतं बलिं प्रयान्तं रणमूर्धनि स्थिताः॥ 11 ॥

mahājaṭābhāradharāstapasvinastadā tamāhurvidhimantramaṅgalaiḥ | abhiṣṭuvantaḥ kavayaḥ svalaṅkṛtaṃ baliṃ prayāntaṃ raṇamūrdhani sthitāḥ

प्रतप्तजाम्बूनदचित्रभूषणैर्दिव्यैश्च रत्नैर्विविधैरलङ्कृतः ।विराजमानः परमेण वर्चसा रणे विभात्यग्निशिखेव दानवः॥ 12 ॥

prataptajāmbūnadacitrabhūṣaṇairdivyaiśca ratnairvividhairalaṅkṛtaḥ | virājamānaḥ parameṇa varcasā raṇe vibhātyagniśikheva dānavaḥ

स वै तदा शत्रुबलार्दितं बलं बलिर्ददर्शोत्तमसत्त्ववीर्यवान् ।जलागमे श्रीमदिवाभ्रमण्डलं विशीर्यमाणं नभसीव वायुना॥ 13 ॥

sa vai tadā śatrubalārditaṃ balaṃ balirdadarśottamasattvavīryavān | jalāgame śrīmadivābhramaṇḍalaṃ viśīryamāṇaṃ nabhasīva vāyunā

ततो ददर्शाथ बलानि सर्वतो रणे प्रगुप्तानि हुताशनेन वै ।समुच्छ्रितान्युग्रतराणि तत्र वै समुद्रवेगानिव पर्वसन्धिषु॥ 14 ॥

tato dadarśātha balāni sarvato raṇe praguptāni hutāśanena vai | samucchritānyugratarāṇi tatra vai samudravegāniva parvasandhiṣu

सशूलशक्त्यृष्टिगदासिसायकान् क्षिपन् रिपूणां समरे महात्मनाम् ।ननाद सिंहर्षभमत्तनागवज्जलागमे तोयदवच्च वीर्यवान्॥ 15 ॥

saśūlaśaktyṛṣṭigadāsisāyakān kṣipan ripūṇāṃ samare mahātmanām | nanāda siṃharṣabhamattanāgavajjalāgame toyadavacca vīryavān

दिव्यास्त्रधूमः सुभुजोग्रवायुर्महाबलः पौरुषविक्रमेन्धनः ।प्रजा दिधक्षन्निव कालवह्निः सुघोररूपो विबभौ रणे बलिः॥ 16 ॥

divyāstradhūmaḥ subhujogravāyurmahābalaḥ pauruṣavikramendhanaḥ | prajā didhakṣanniva kālavahniḥ sughorarūpo vibabhau raṇe baliḥ