Parva 2, Adhyāya 54

राजानां अनुरोधं स्वीकृत्वा श्रीकृष्णोपरि विजयं प्राप्तुं कालयवनस्य प्रस्थानं एवं कथयमानं तं शाल्वराजं नृपाज्ञया ।उवाच परमप्रीतो यवनाधिपतिर्नृपः॥ 1 ॥

rājānāṃ anurodhaṃ svīkṛtvā śrīkṛṣṇopari vijayaṃ prāptuṃ kālayavanasya prasthānaṃ evaṃ kathayamānaṃ taṃ śālvarājaṃ nṛpājñayā | uvāca paramaprīto yavanādhipatirnṛpaḥ

धन्योऽस्म्यनुगृहीतोऽस्मि सफलं जीवितं मम ।कृष्णनिग्रहहेतोर्यन्नियुक्तो बहुभिर्नृपैः॥ 2 ॥

dhanyo'smyanugṛhīto'smi saphalaṃ jīvitaṃ mama | kṛṣṇanigrahahetoryanniyukto bahubhirnṛpaiḥ

दुर्जयस्त्रिषु लोकेषु सुरासुरगणैरपि ।तस्य निग्रहहेतोर्मामवधार्य जयाशिषम्॥ 3 ॥

durjayastriṣu lokeṣu surāsuragaṇairapi | tasya nigrahahetormāmavadhārya jayāśiṣam

प्रहृष्टै राजसिंहैस्तैरवधार्यो जयो मम ।तेषां वाचाम्बुवर्षेण विजयो मे भविष्यति॥ 4 ॥

prahṛṣṭai rājasiṃhaistairavadhāryo jayo mama | teṣāṃ vācāmbuvarṣeṇa vijayo me bhaviṣyati

करिष्ये वचनं तेषां नृपसत्तमचोदितम् ।पराजयोऽपि राजेन्द्र जयेन सदृशो मम॥ 5 ॥

kariṣye vacanaṃ teṣāṃ nṛpasattamacoditam | parājayo'pi rājendra jayena sadṛśo mama

अद्यैव तिथिनक्षत्रं मुहूर्तं करणं शुभम् ।यास्यामि मथुरां राजन् विजेतुं केशवं रणे॥ 6 ॥

adyaiva tithinakṣatraṃ muhūrtaṃ karaṇaṃ śubham | yāsyāmi mathurāṃ rājan vijetuṃ keśavaṃ raṇe

एवमाभाष्य राजानं सौभस्य पतिमूर्जितम् ।सत्कृत्य च यथान्यायं महार्हमणिभूषणैः॥ 7 ॥

evamābhāṣya rājānaṃ saubhasya patimūrjitam | satkṛtya ca yathānyāyaṃ mahārhamaṇibhūṣaṇaiḥ

ब्राह्मणेभ्यो ददौ वित्तं सिद्धादेशाय वै नृपः ।पुरोहिताय राजेन्द्र प्रददौ बहुशो धनम्॥ 8 ॥

brāhmaṇebhyo dadau vittaṃ siddhādeśāya vai nṛpaḥ | purohitāya rājendra pradadau bahuśo dhanam

हुत्वाग्निं विधिवद् राजा कृतकौतुकमङ्गलः ।प्रस्थानं कृतवान् सम्यग् जेतुकामो जनार्दनम्॥ 9 ॥

hutvāgniṃ vidhivad rājā kṛtakautukamaṅgalaḥ | prasthānaṃ kṛtavān samyag jetukāmo janārdanam

शाल्वोऽपि भरतश्रेष्ठ कृतार्थो हृष्टमानसः ।यवनेन्द्रं परिष्वज्य जगाम स्वपुरं नृपः॥ 10 ॥

śālvo'pi bharataśreṣṭha kṛtārtho hṛṣṭamānasaḥ | yavanendraṃ pariṣvajya jagāma svapuraṃ nṛpaḥ