Skandha 8, Adhyāya 9

तेऽन्योन्यतोऽसुराः पात्रं हरन्तस्त्यक्तसौहृदाः ।क्षिपन्तो दस्युधर्माण आयान्तीं ददृशुः स्त्रियम्॥ 1 ॥

te'nyonyato'surāḥ pātraṃ harantastyaktasauhṛdāḥ | kṣipanto dasyudharmāṇa āyāntīṃ dadṛśuḥ striyam

का त्वं कञ्जपलाशाक्षि कुतो वा किं चिकीर्षसि ।कस्यासि वद वामोरु मथ्नन्तीव मनांसि नः॥ 3 ॥

kā tvaṃ kañjapalāśākṣi kuto vā kiṃ cikīrṣasi | kasyāsi vada vāmoru mathnantīva manāṃsi naḥ

न वयं त्वामरैर्दैत्यैः सिद्धगन्धर्वचारणैः ।नास्पृष्टपूर्वां जानीमो लोकेशैश्च कुतो नृभिः॥ 4 ॥

na vayaṃ tvāmarairdaityaiḥ siddhagandharvacāraṇaiḥ | nāspṛṣṭapūrvāṃ jānīmo lokeśaiśca kuto nṛbhiḥ

नूनं त्वं विधिना सुभ्रूः प्रेषितासि शरीरिणाम् ।सर्वेन्द्रियमनःप्रीतिं विधातुं सघृणेन किम्॥ 5 ॥

nūnaṃ tvaṃ vidhinā subhrūḥ preṣitāsi śarīriṇām | sarvendriyamanaḥprītiṃ vidhātuṃ saghṛṇena kim

सा त्वं नः स्पर्धमानानामेकवस्तुनि मानिनि ।ज्ञातीनां बद्धवैराणां शं विधत्स्व सुमध्यमे॥ 6 ॥

sā tvaṃ naḥ spardhamānānāmekavastuni mānini | jñātīnāṃ baddhavairāṇāṃ śaṃ vidhatsva sumadhyame

वयं कश्यपदायादा भ्रातरः कृतपौरुषाः ।विभजस्व यथान्यायं नैव भेदो यथा भवेत्॥ 7 ॥

vayaṃ kaśyapadāyādā bhrātaraḥ kṛtapauruṣāḥ | vibhajasva yathānyāyaṃ naiva bhedo yathā bhavet

इत्युपामन्त्रितो दैत्यैर्मायायोषिद्वपुर्हरिः ।प्रहस्य रुचिरापाङ्गैर्निरीक्षन्निदमब्रवीत्॥ 8 ॥

ityupāmantrito daityairmāyāyoṣidvapurhariḥ | prahasya rucirāpāṅgairnirīkṣannidamabravīt

कथं कश्यपदायादाः पुंश्चल्यां मयि सङ्गताः ।विश्वासं पण्डितो जातु कामिनीषु न याति हि॥ 9 ॥

kathaṃ kaśyapadāyādāḥ puṃścalyāṃ mayi saṅgatāḥ | viśvāsaṃ paṇḍito jātu kāminīṣu na yāti hi

सालावृकाणां स्त्रीणां च स्वैरिणीनां सुरद्विषः ।सख्यान्याहुरनित्यानि नूत्नं नूत्नं विचिन्वताम्॥ 10 ॥

sālāvṛkāṇāṃ strīṇāṃ ca svairiṇīnāṃ suradviṣaḥ | sakhyānyāhuranityāni nūtnaṃ nūtnaṃ vicinvatām

जहसुर्भावगम्भीरं ददुश्चामृतभाजनम्॥ 11 ॥

jahasurbhāvagambhīraṃ daduścāmṛtabhājanam

ततो गृहीत्वामृतभाजनं हरि- र्बभाष ईषत्स्मितशोभया गिरा ।यद्यभ्युपेतं क्व च साध्वसाधु वा कृतं मया वो विभजे सुधामिमाम्॥ 12 ॥

tato gṛhītvāmṛtabhājanaṃ hari- rbabhāṣa īṣatsmitaśobhayā girā | yadyabhyupetaṃ kva ca sādhvasādhu vā kṛtaṃ mayā vo vibhaje sudhāmimām

इत्यभिव्याहृतं तस्या आकर्ण्यासुरपुङ्गवाः ।अप्रमाणविदस्तस्यास्तत्तथेत्यन्वमंसत॥ 13 ॥

ityabhivyāhṛtaṃ tasyā ākarṇyāsurapuṅgavāḥ | apramāṇavidastasyāstattathetyanvamaṃsata

अथोपोष्य कृतस्नाना हुत्वा च हविषानलम् ।दत्त्वा गोविप्रभूतेभ्यः कृतस्वस्त्ययना द्विजैः॥ 14 ॥

athopoṣya kṛtasnānā hutvā ca haviṣānalam | dattvā goviprabhūtebhyaḥ kṛtasvastyayanā dvijaiḥ

यथोपजोषं वासांसि परिधायाहतानि ते ।कुशेषु प्राविशन् सर्वे प्रागग्रेष्वभिभूषिताः॥ 15 ॥

yathopajoṣaṃ vāsāṃsi paridhāyāhatāni te | kuśeṣu prāviśan sarve prāgagreṣvabhibhūṣitāḥ

प्राङ्मुखेषूपविष्टेषु सुरेषु दितिजेषु च ।धूपामोदितशालायां जुष्टायां माल्यदीपकैः॥ 16 ॥

prāṅmukheṣūpaviṣṭeṣu sureṣu ditijeṣu ca | dhūpāmoditaśālāyāṃ juṣṭāyāṃ mālyadīpakaiḥ

तस्यां नरेन्द्र करभोरुरुशद्दुकूल- श्रोणीतटालसगतिर्मदविह्वलाक्षी ।सा कूजती कनकनूपुरशिञ्जितेन कुम्भस्तनी कलशपाणिरथाविवेश॥ 17 ॥

tasyāṃ narendra karabhoruruśaddukūla- śroṇītaṭālasagatirmadavihvalākṣī | sā kūjatī kanakanūpuraśiñjitena kumbhastanī kalaśapāṇirathāviveśa

तां श्रीसखीं कनककुण्डलचारुकर्ण- नासाकपोलवदनां परदेवताख्याम् ।संवीक्ष्य सम्मुमुहुरुत्स्मितवीक्षणेन देवासुरा विगलितस्तनपट्टिकान्ताम्॥ 18 ॥

tāṃ śrīsakhīṃ kanakakuṇḍalacārukarṇa- nāsākapolavadanāṃ paradevatākhyām | saṃvīkṣya sammumuhurutsmitavīkṣaṇena devāsurā vigalitastanapaṭṭikāntām

असुराणां सुधादानं सर्पाणामिव दुर्नयम् ।मत्वा जातिनृशंसानां न तां व्यभजदच्युतः॥ 19 ॥

asurāṇāṃ sudhādānaṃ sarpāṇāmiva durnayam | matvā jātinṛśaṃsānāṃ na tāṃ vyabhajadacyutaḥ

कल्पयित्वा पृथक् पङ्क्तीरुभयेषां जगत्पतिः ।तांश्चोपवेशयामास स्वेषु स्वेषु च पङ्क्तिषु॥ 20 ॥

kalpayitvā pṛthak paṅktīrubhayeṣāṃ jagatpatiḥ | tāṃścopaveśayāmāsa sveṣu sveṣu ca paṅktiṣu

दैत्यान् गृहीतकलशो वञ्चयन्नुपसञ्चरैः ।दूरस्थान् पाययामास जरामृत्युहरां सुधाम्॥ 21 ॥

daityān gṛhītakalaśo vañcayannupasañcaraiḥ | dūrasthān pāyayāmāsa jarāmṛtyuharāṃ sudhām

ते पालयन्तः समयमसुराः स्वकृतं नृप ।तूष्णीमासन् कृतस्नेहाः स्त्रीविवादजुगुप्सया॥ 22 ॥

te pālayantaḥ samayamasurāḥ svakṛtaṃ nṛpa | tūṣṇīmāsan kṛtasnehāḥ strīvivādajugupsayā

तस्यां कृतातिप्रणयाः प्रणयापायकातराः ।बहुमानेन चाबद्धा नोचुः किञ्चन विप्रियम्॥ 23 ॥

tasyāṃ kṛtātipraṇayāḥ praṇayāpāyakātarāḥ | bahumānena cābaddhā nocuḥ kiñcana vipriyam

देवलिङ्गप्रतिच्छन्नः स्वर्भानुर्देवसंसदि ।प्रविष्टः सोममपिबच्चन्द्रार्काभ्यां च सूचितः॥ 24 ॥

devaliṅgapraticchannaḥ svarbhānurdevasaṃsadi | praviṣṭaḥ somamapibaccandrārkābhyāṃ ca sūcitaḥ

चक्रेण क्षुरधारेण जहार पिबतः शिरः ।हरिस्तस्य कबन्धस्तु सुधयाऽऽप्लावितोऽपतत्॥ 25 ॥

cakreṇa kṣuradhāreṇa jahāra pibataḥ śiraḥ | haristasya kabandhastu sudhayā''plāvito'patat

शिरस्त्वमरतां नीतमजो ग्रहमचीकॢपत् ।यस्तु पर्वणि चन्द्रार्कावभिधावति वैरधीः॥ 26 ॥

śirastvamaratāṃ nītamajo grahamacīkḷpat | yastu parvaṇi candrārkāvabhidhāvati vairadhīḥ

पीतप्रायेऽमृते देवैर्भगवान् लोकभावनः ।पश्यतामसुरेन्द्राणां स्वं रूपं जगृहे हरिः॥ 27 ॥

pītaprāye'mṛte devairbhagavān lokabhāvanaḥ | paśyatāmasurendrāṇāṃ svaṃ rūpaṃ jagṛhe hariḥ

एवं सुरासुरगणाः समदेशकाल- हेत्वर्थकर्ममतयोऽपि फले विकल्पाः ।तत्रामृतं सुरगणाः फलमञ्जसाऽऽपु- र्यत्पादपङ्कजरजःश्रयणान्न दैत्याः॥ 28 ॥

evaṃ surāsuragaṇāḥ samadeśakāla- hetvarthakarmamatayo'pi phale vikalpāḥ | tatrāmṛtaṃ suragaṇāḥ phalamañjasā''pu- ryatpādapaṅkajarajaḥśrayaṇānna daityāḥ

यद्युज्यतेऽसुवसुकर्ममनोवचोभि- र्देहात्मजादिषु नृभिस्तदसत्पृथक्त्वात् ।तैरेव सद्भवति यत्क्रियतेऽपृथक्त्वात् सर्वस्य तद्भवति मूलनिषेचनं यत्॥ 29 ॥

yadyujyate'suvasukarmamanovacobhi- rdehātmajādiṣu nṛbhistadasatpṛthaktvāt | taireva sadbhavati yatkriyate'pṛthaktvāt sarvasya tadbhavati mūlaniṣecanaṃ yat

अष्टमस्कन्धे अमृतमथने नवमोऽध्यायः॥ 9b ॥

aṣṭamaskandhe amṛtamathane navamo'dhyāyaḥ